Qaraǵandyda kommýnaldyq qyzmetterdiń IQala biryńǵaı saıty iske qosyldy
Endi qaraǵandylyqtarǵa kommýnaldyq qyzmet uıymdaryna barýdyń qajeti joq. Kommýnaldyq qyzmetterdi alýǵa kelisimshart jasasý, aqy somasyn tómendetý úshin úıde turatyn adamdar sanyn azaıtý jáne ózge de qyzmetterdi endi úıden shyqpaı, IQala saıtynda alýǵa bolady.
Joba jańadan iske asyrylyp jatqandyqtan, aldaǵy ýaqytta qyzmetter túri arttyrylatyn bolady.
IQala saıtynda ótinish berý úshin Elektrondy tsıfrlyq qoltańba qajet bolady.
Qazir portalda úsh iri monopolıst - «Qaraǵandy Jaryq» JShS, «Jylýtranzıt-Qaraǵandy» JShS, «Qaraǵandyenergo Salasynyń» 26 qyzmeti tsıfrlandyryldy. Bolashaqta kommýnaldyq qyzmetter tizimi keńeıtiledi.
Jańa aqparattyq júıe Qaraǵandy oblysynyń ákimi Ermaǵanbet Bólekpaevqa tanystyryldy.
Aqparattandyrý, memlekettik qyzmetter kórsetý jáne muraǵattar basqarmasynyń basshysy Rýstam Baıjanovtyń aıtýynsha, IQala ortalyǵynyń basty mindeti – qyzmet kórsetý protsesin avtomattandyrý, qaǵazbastylyqty, qyzmet berýshilermen baılanys pen sybaılas jemqorlyq táýekelderin boldyrmaý.
«Biryńǵaı ortalyq qurý tutynýshylardyń monopolıstermen qarym-qatynasyn jeńildetedi. Turǵyndar ýaqytyn únemdeı alady. Barlyq ótinishter eń qysqa merzimde pysyqtalýy tıis. Eger júıeniń kemshilikteri anyqtalsa, olardy dereý túzetý kerek. Múmkindiginshe kóp qyzmet tsıfrlandyrylýy qajet», – dep atap ótti Ermaǵanbet Bólekpaev.
