Qaraǵandyda qazaqtyń úsh bıine arnalǵan eskertkish ashyldy

QARAǴANDY. QazAqmarat - Qaraǵandyda qazaqtyń áıgili úsh bıi - Áıteke bı, Qazybek bı, Tóle bıge eskertkish ashyldy. Bul oblystaǵy alǵashqy músindik kompozıtsııa, dep habarlaıdy QazAqparat tilshisi.

Eskertkish oblystyq sot ǵımaratynyń aldynda ornatylǵan jáne danalyq pen ádilet nyshany retinde kórinis tapqan.

«Uly dalanyń aty ańyzǵa aınalǵan úsh bıine eskertkishtiń ashylýy - mańyzdy oqıǵa. Áıteke bı, Qazybek bı, Tóle bıdiń esimderi qazaq memleketi men qazaq sot tóreliginiń negizi qalanýy tyǵyz baılanysty. Ómirlik tájirıbesi men minsiz bedeliniń arqasynda olardyń sheshimderi ádil bolǵan jáne kúmán týdyrmaǵan. Bul eskertkish sot tóreliginiń nyshany retinde Qazaqstan halqy aldyndaǵy sýdıalardyń jaýapkershiligin eske salyp otyrady», - dedi Qaraǵandy oblysynyń ákimi Jeńis Qasymbek músin kompozıtsııasynyń ashylýynda.

«Úsh uly bı tarıhymyzǵa qoǵam jáne saıası qaıratkerler retinde engen. Olar tek bitimger sýdıa ǵana emes, handardyń keńesshisi de boldy. Bılerdiń keńesin basqardy. Olar baı ómirlik tájirıbesi bar, qazaq halqynyń tarıhyn, dástúrin biletin dana adamdar boldy. Áıgili bılerimizdiń negizgi mindeti qoǵamdaǵy turaqtylyqty saqtaý edi. Olar rıtorıka, nanym sheberligine ıe bolǵan. Biz osy kúnge deıin olardyń naqyl sózderine, ósıetterine súıenemiz», - deıdi eskertkish ornatýdyń bastamashysy, Qaraǵandy oblystyq sotynyń tóraǵasy Nurserik Sháripov.

Onyń aıtýynsha, «Úsh bı» eskertkishi sot saraıynyń arhıtektýralyq ansamblimen biriktirilip josparlanǵan. Oblystyq sottyń jańa ǵımaraty ótken jyldyń qarasha aıynda ashyldy. Músindi jyldyń basynda jasaı bastady, ornatýǵa tórt aıǵa jýyq ýaqyt ketti.

«Biz qazirgi kúni kópshilikke tanymal úsh bıdiń beınesin qaıtalamaýǵa tyrystyq. Dınamıkany kórsetkimiz keldi. Bul ǵasyrlar boıy kele jatqan dástúrlerge qarap, urpaqtar kózqarastaryn qalyptastyrý úshin jasalyp otyrǵan dúnıe», - dep atap ótti Nurserik Sháripov.

Eskertkish Almatyda jasalǵan. Avtory - halyq sheberi Jeńis Erkinuly.

Músindik kompozıtsııanyń ashylýyna ardager sýdıalar qatysty. Gúl shoqtaryn qoıý rásiminen keıin qonaqtar oblystyq sottyń jańa ǵımaratyn qarap shyqty.

Aımaq basshysy sondaı-aq azamattardyń sot júıesine degen senimin arttyrýdyń mańyzdylyǵyn atap ótti. Sot jumysy sandyq tehnologııalardy engizý arqyly ashyq bolady. Karantın kezeńinde sońǵy aılarda sottar onlaın rejımde jumys isteıdi, sot talap-aryzdar men basqa da qujattar elektrondy túrde qabyldanady.