Qaraǵandyda qatty jelden mekteptiń shatyry ushty

QARAǴANDY. QazAqparat – Kúshti jeldiń saldarynan Qaraǵandydaǵy mektepterdiń biriniń shatyry qırady. Zaqymdalǵan tóbeniń aýmaǵy 400 sharshy metrden asty. Oqý protsesi toqtatyldy, dep habarlaıdy QazAqparat tilshisi.

Tótenshe jaǵdaı 15 qarashada boldy. Qatty jeldiń saldarynan Qaraǵandy qalasynyń №59 mektebiniń shatyry ushyp ketken.

«15 qarasha saǵat 15.00 shamasynda Qaraǵandyda ekpini sekýndyna 19 metrge deıin jetken qatty jeldiń saldarynan №59 orta mekteptiń 3 qabatty ǵımaratynyń shatyry jartylaı buzyldy. Mekteptegi oqý protsesi toqtatyldy, ǵımarattan ekinshi aýysymdaǵy 400 oqýshy men 37 qyzmetker shyǵaryldy. Zardap shekkender joq», - dep habarlady Qaraǵandy oblysy TJD baspasóz qyzmeti,

Oqıǵa kezinde mektep ujymy jumyldyrylyp, búkil oqýshylar ǵımarattan evakýatsııalanyp, úıine jiberildi.

Búginde mektep shtattyq rejımde jumys isteıdi. Oqý ornynda 947 bala bilim alady.

«TJB qyzmetkerleri zardap shekken shatyr ýchaskesin zerttep, tóbeden synǵan aǵash arqalyqtaryn jáne qıraǵan shatyr bólikterin alyp tastady. Búgin, 16 qarashada, mektep qyzmetkerleriniń kúshimen aýla tazalanyp, barlyǵy shyǵaryldy. Mekteptiń shatyry 2011 jyly jóndelgen bolatyn: ol kezde jabyn tolyǵymen aýystyryldy. Osy ýaqytqa deıin shatyrdyń jaǵdaıy oıdaǵydaı edi. Shatyrdyń zaqymdanǵan jeri - 480 sharshy metr. Búgin tótenshe jaǵdaıda TJB, Qaraǵandy ákimdigi, bilim bólimi, mektep ákimshiligi aqaýly vedomost daıyndady, smetalyq qujattama ázirlenip jatyr, sodan keıin qajetti qarajat kólemi belgili bolady, sondaı-aq qarjylandyrý kózi men jóndeý jumysynyń merzimi aıqyndalady», - dep túsindirdi bilim bóliminde.