Qaraǵandyda kásipkerge syrtqy jarnamany rásimdeýge kómektesetin Sall-ortalyq quryldy

QARAǴANDY. QazAqparat - Qaraǵandy oblysynda syrtqy jarnamalardy memlekettik tilde rásimdeýge kómektesetin biryńǵaı Sall-ortalyq quryldy, dep habarlaıdy QazAqparat.

Oblys ákimdigi baspasóz qyzmetiniń málimetinshe, Qaraǵandy oblysynda kásipkerlerge syrtqy jarnamalar men vızýaldy aqparat mátinin rásimdeýge kómektesetin biryńǵaı Sall-ortalyq quryldy. Ortalyqtan WhatsApp jáne Telegram messendjeri arqyly keńes alýǵa bolady.

Kásipkerler bannerdegi jarnama mátini, fırmanyń nemese dúkenniń ataýy qazaq tilinde saýatty jazylǵanyna kúmándansa, onda tekserý úshin ortalyq mamandarynyń kómegine júginýge bolady.
«Bul qyzmet tek syrtqy jarnamaǵa qatysty ekenin atap ótkim keledi. Biz aýdarmamen aınalyspaımyz, biraq jarnama mátini, fırma nemese dúken ataýy qazaq tilinde qanshalyqty saýatty jazylǵanyn tekseremiz. Bul qyzmet túri tegin», - deıdi oblystyq Tilderdi damytý boıynsha basqarmanyń bólim basshysy Ásel Qashqynbekova.

Telegram-da biryńǵaı arna men top ashylǵan. Elektrondyq poshtaǵa ([e-mail]) hat jazýǵa bolady.
Sonymen qatar basqarmanyń Feısbýk jáne Instagram paraqshalarynda oblystyń aýdan, qalalaryndaǵy jaýapty mamandar týraly, jumys telefony jáne ortalyqtyń WhatsApp nómiri kórsetilgen aqparat jarııalandy.