Qaraǵandyda er adam ózin ózi órtep jibermek boldy

QARAǴANDY. QazAqparat - Qaraǵandynyń Polıtsııa departamenti ǵımaratynyń aldynda er adam ózin ózi órtemek boldy. Bul áreketi arqyly ol sot isiniń ádil ótýin talap etken, dep habarlaıdy QazAqparat tilshisi.

12 jeltoqsan kúni Qaraǵandy oblystyq Polıtsııa departamentiniń aldynda qala turǵyny qolyna janarmaı quıylǵan quty alyp, ózin-ózi órtep jiberemin dep qorqytqan. Tártip buzýshymen departament bastyǵynyń orynbasary kelissóz júrgizdi. Onyń zańsyz áreketterin toqtatý týraly talaptaryna qala turǵyny kónbeı, ózine jáne aınalasyndaǵylarǵa qaýip týdyrǵan. Osylaısha er adam sotta qaralyp jatqan azamattyq isti sheshýdi talap etken.

«Aǵymdaǵy jyldyń aqpan aıynda «Jan Dos» qoǵamdyq uıymy Qaraǵandy qalalyq Polıtsııa basqarmasyna qarasty polıtsııa bólimderiniń aınalasyn qorshaý boıynsha tender utyp alǵan. Alaıda, Qaraǵandy oblystyq Polıtsııa departamentiniń mamandary tekserý kezinde «Jan Dos» qoǵamdyq uıymy ókilderine jumystyń sapasyz jasalǵandyǵyn kórsetken. Atalǵan derek boıynsha departamenttiń zań bólimi sotqa aryz berip, sot olarǵa 30 qarashaǵa deıin kemshilikterdiń ornyn toltyrýǵa ýaqyt bergen. Dese de jaýap berýshi tarap kemshilikterdi múlde joımaǵan. Sondyqtan 6 jeltoqsan kúni Memlekettik satyp alý portalynda Memlekettik satyp alý týraly zańnyń 12-baby 4-tarmaǵy 3-tarmaqshasyna sáıkes, jiberilgen kemshilikterge baılanysty buryn jasalǵan kelisim-shart birjaqty buzyldy. Kelisim-shartty buzýǵa shartta kórsetilgen mindetterdi tıisinshe oryndamaý sebep bolǵan», - dep túsindirdi Qaraǵandy oblysynyń PD baspasóz qyzmetinen.

Qazirgi tańda atalmysh is boıynsha materıaldar sottyń qaraýynda jáne ony qaraý 2022 jyldyń 14 jeltoqsanyna belgilengen.

Al buzaqylyq áreketke barǵan er adam ózine jáne aınalasyndaǵylarǵa zııan keltirmeý maqsatynda ustalyp, polıtsııaǵa jetkizildi.

Foto: instagram.com/ekaraganda.kz