Qaraǵandyda «Dúnıege keler áli talaı Qasym» atty aqyndar baıqaýy ótti
Baıqaý halyq arasynda «daýylpaz aqyn» atanǵan Qasym Amanjolovtyń esimimen atalyp otyr.
Osy jyldan bastap respýblıkalyq deńgeıde ótip jatqan baıqaýǵa qatysýǵa elimizdiń 16 aımaǵynan 18 ben 40 jas aralyǵyndaǵy 70 adam ótinish tapsyrǵan.
Aqtyq kezeńge qatysýǵa Astana, Almaty qalalarynan, Aqmola, Almaty, Batys Qazaqstan, Jambyl, Mańǵystaý, Pavlodar, Túrkistan, Qaraǵandy oblystarynan 17 úzdik úmitkerler iriktep alyndy.
Baıqaýǵa qatysýshylar Qasym Amanjolovqa, sanany jańǵyrtý jáne erkin taqyrypta jazylǵan 3 óleńderin usyndy. Qazylar alqasy týyndylardyń kórkemdik sapasy men stılıstıkalyq ózgesheligine nazar aýdardy. Baıqaýdyń jeńimpazdary men laýreattary dıplomdarmen jáne aqshalaı sertıfıkattarmen marapattaldy.
Baıqaýdyń Gran-prı syılyǵyn Qaraǵandy oblysynyń turǵyny Jánibek Áliman utyp aldy. Qazylar alqasynyń tóraǵasy, tanymal aqyn, Qazaqstan Jazýshylar odaǵynyń múshesi, «Alash» syılyǵynyń laýreaty Ǵalym Jaılybaı jeńimpazǵa dıplom men 500 000 teńgeniń sertıfıkatyn tabys etti.
Qazylar alqasy birinshi oryndy Qaraǵandy oblysynyń turǵyny Raýan Qabıdoldınge taǵaıyndady.
Ekinshi oryn - Mańǵystaý oblysynyń turǵyny Asylbek Jańbyrbaıǵa jáne Qaraǵandy oblysynyń aqyny Janat Jańqashulyna berildi. Úshynshy orynda - Túrkistan oblysynan kelgen Arqalyq Ámalııatuly, Almaty oblysynyń týmasy Muqtar Kúmisbek jáne Jambyl oblysynyń turǵyny Hamıt Esemanov. Alǵashqy úsh orynǵa dıplomdar men 350 000, 250 000 jáne 150 000 teńgeniń sertıfıkattary tabys etildi.
Baıqaýǵa qatysqan basqa aqyndarǵa 30 000 teńge kóleminde jubanysh syılyqtary berildi. Baıqaý «Rýhanı jańǵyrý» baǵdarlamasynyń sheńberinde ótkizildi. Uıymdastyrýshy - Qaraǵandy oblysynyń Tilderdi damytý jónindegi basqarmasy.
Baıqaýdyń maqsaty men mindeti - Qasym Amanjolovtyń ádebı murasyn respýblıkamyzdyń shyǵarmashyl jastary arasynda tanymal etý, poezııadaǵy jańa esimderdi anyqtaý, olardyń shyǵarmashylyǵyn qoldaý, elimizdiń jetistikterin, tarıhı ótkeni men kemel bolashaǵyn asqaqtatý.
