Qaraǵandyda balalardyń jappaı ýlanýy: ortalyqqa bıyl 1,5 mlrd teńge bólingen
«Qaraǵandy oblysynyń balalarǵa arnaýly áleýmettik qyzmet kórsetý ortalyǵy» KMM 1977 jyly qurylǵan. Bul mekemede 1,5 jastan 18 jasqa deıingi psıhonevrologııalyq aýrýlary bar múgedek balalar tárbıelenedi. Qazirgi ýaqytta ortalyqta 202 bala áleýmettik qyzmet alady, onyń 160-y statsıonar jaǵdaıynda tursa, 42-i jartylaı statsıonar jaǵdaıynda kúndizgi bólimshede em alady.
Sondaı-aq, balalar jynystyq belgileri boıynsha 6 topqa bólingen. Bul 30 shildede Ortalyqta tek uldar ýlanǵanynyń sebebin túsindiredi. Ol balalar bir topta bolǵan.
Jumyspen qamtýdy úılestirý jáne áleýmettik baǵdarlamalar basqarmasynyń aqparaty boıynsha, 2022 jyly ortalyqqa 1 313 004 000 teńge, al 2023 jyly – 1 456 287 000 teńge qarajat bólingen. Atalǵan Ortalyq osyndaı qyrýar aqshaǵa qandaı qyzmet kórsetedi degen suraqqa bylaısha jaýap berdi:
«Qaraǵandy oblysynyń balalarǵa arnaýly áleýmettik qyzmetter kórsetý ortalyǵy» KMM arnaýly áleýmettik qyzmetterdiń kepildi kólemin kórsetedi, oǵan 8 qyzmet kiredi: áleýmettik-turmystyq; áleýmettik-medıtsınalyq; áleýmettik-psıhologııalyq; áleýmettik-pedagogıkalyq; áleýmettik-eńbek; áleýmettik-mádenı; áleýmettik-ekonomıkalyq; áleýmettik-quqyqtyq qyzmetter», - dep habarlady vedomstvodan.
Sondaı-aq, brıfıng barysynda jýrnalıster Qaraǵandy oblysynyń ákimine onyń orynbasary osy mekemege buryn-sońdy barǵan-barmaǵany týraly surady. Belgili bolǵandaı, ákimniń orynbasary osyǵan deıin ortalyqtyń jumysymen tanysý úshin bul mekemede eki ret bolǵan eken. Tipti tárbıelenýshilerge qajetti qosymsha nysan salý máselesin talqylaǵanyn jetkizdi.
«Men bul ortalyqqa eki ret bardym. Biz osy balalarǵa arnalǵan monsha men shaǵyn basseın salý jobasyn talqyladyq. Aqpan aıynda bul mekeme prokýratýramen birlesip tekserildi. Ol kezde mundaı buzýshylyqtar bolǵan joq, basqa quqyq buzýshylyqtar boldy», - dep atap ótti Qaraǵandy oblysy ákiminiń orynbasary Ermek Alpysov.
Tárbıelenýshiler úshin monsha men basseınniń qajettiligi týraly máseleni ortalyqtyń dırektory Aıman Jaǵyparova kótergen bolatyn. Ol atalmysh mekemeni 2019 jyldan bastap basqaryp keledi. Belgili bolǵandaı, ol 24 shildeden bastap eńbek demalysynda bolǵan.
Jalpy ortalyqta 374 qyzmetker jumys isteıdi. Sotqa deıingi tergeý aıaqtalǵanǵa deıin tekserý kezinde ortalyq dırektorynyń mindetin atqarýshy jáne osy ortalyqtyń 12 medıtsına qyzmetkeri jumystan jáne óz mindetterin oryndaýdan shettetildi. Bul qyzmetkerlerdiń ornyna qazir basqa medıtsınalyq mekemelerdiń medıtsına qyzmetkerleri jumyldyrylǵan.
«Óz tarapymnan atalmysh tótenshe jaǵdaı nazarsyz qalmaıtynyna sendirgim keledi. Kináliler zań talaptaryna sáıkes qatań jazalanady. Tergeý organdary barlyq qajetti sharalardy júrgizedi. Biz úshin qazir eń bastysy – balalardyń ómirin saqtap qalý», - dedi Qaraǵandy oblysynyń ákimi Ermaǵanbet Bólekpaev.
Eske sala keteıik, 30 shildede Qaraǵandy oblysynyń Balalarǵa arnaýly áleýmettik qyzmet kórsetý ortalyǵynda birneshe bala ýlanyp, olardyń bireýi qaza taýyp, altaýy jansaqtaý bóliminde jatyr.
Bas Prokýratýra ýákiletti memlekettik organdar men aýmaqtyq prokýrorlarǵa elde osyndaı mekemelerge keshendi tekserýler uıymdastyrýdy tapsyrdy.
QR Densaýlyq saqtaý mınıstri Ajar Ǵınııat habarlaǵandaı, ishek ınfektsııalaryna júrgizilgen synaqtar teris nátıje berdi. Balalardyń ýlanýynyń naqty sebebi áli anyqtalǵan joq.
