Qaraǵandyda avtobýs parki jańartylady

QARAǴANDY. QazAqparat - Qaraǵandyda jaqyn arada jolaýshylar tek jańa kólikpen júretin bolady. Eski avtobýstar men mıkroavtobýstar qalalyq baǵyttardan alyp tastalady. Bul týraly aımaq basshysy Jeńis Qasymbek Saryarqa arnasynyń tikeleı efırinde telekórermenderdiń suraqtaryna jaýap bergen kezinde málim etti, dep habarlaıdy QazAqparat tilshisi.

Oblys ákimi Yutong markaly avtobýstar shyǵara bastaǵan QazTehna zaýytynyń jumysy týraly aıtty.

«Bir apta buryn Saran qalasyndaǵy burynǵy RTB zaýyty aýmaǵynda óndiris iske qosyldy. Bir kezderi bul 15 myńǵa jýyq adam jumys isteıtin úlken zaýyt bolǵan. Sodan keıin ol toqtap qaldy. Búgin biz osy alyptyń alańdarynda jańa óndiristi ashýǵa tyrysýdamyz. Olardyń birinshisi – avtobýs zaýyty. Bul QazTehna kompanııasynyń birlesken óndirisi, oǵan bizdiń ónerkásiptiń kóshbasshysy «Saryarqa Avtoprom» jáne iri óndirýshilerdiń biri - Yutong kompanııasy qatysady. «Saryarqa» ÁKK úlesi de bar», - dep atap ótti Jeńis Qasymbek.

Ol kásiporynnyń 450 avtobýsqa, onyń ishinde Qaraǵandyǵa da tapsyrystary bar ekenin habarlady.

Zaýyttyń qýattylyǵy – jylyna 1 200 avtobýsty quraıdy. Birinshi kezeńde iri torapty qurastyrý oryndalady. Keıinnen usaq torapty qurastyrýǵa kóshý josparlanýda.

«Qaraǵandyda táýligine 400-den astam avtobýs marshrýtqa shyǵady. Olardyń kópshiligi 10-15 jyl buryn shyǵarylǵan qoǵamdyq kólikter. Jolaýshylar tarapynan servıs sapasyna qatysty túsip jatqan shaǵymdar óte durys. Biz ózimizge oblys ortalyǵyndaǵy barlyq jolaýshy tasymaldaý kólikteri parkin tolyq jańartý mindetin qoıyp otyrmyz. Protsess ótken jyly bastaldy. Yutong markaly 90-ǵa jýyq jańa avtobýs qala marshrýttaryna shyqty. Qazir QazTehna zaýytymen kelisimsharttar jasaldy. Naýryz aıynda 60 jańa avtobýs keledi. Jalpy, bir jarym-eki jyl ishinde avtobýs parki tolyqtaı jańartylýy tıis», - dedi Jeńis Qasymbek.

Onyń aıtýynsha, jańartý baǵdarlamasy Temirtaýda da bastalǵan.

Sondaı-aq, oblys ákimi mektep avtobýstaryn satyp alý josparlary týraly habarlady.

Osy aptada Saran qalasyndaǵy zaýytta shyǵarylǵan alǵashqy mektep avtobýsy El Prezıdentiniń atynan Qaraǵandy qalasynyń №104 mektep-gımnazııasyna syıǵa tartyldy.

«Bir jyl ishinde biz oblystyń barlyq 504 mektebin qamtamasyz ete almaımyz, mundaı mindet turǵan joq. Júz paıyz barlyq mektepter avtobýstarǵa muqtaj emes. Balalardy tasymaldaý talap etiletin balalar úıleri, shalǵaıdaǵy shaǵyn jınaqty aýdandyq mektepter jańa avtobýstarmen qamtamasyz etiletin bolady. Qalada qosymsha kólik qajet bolatyn birqatar mektepter bar. Olardyń barlyǵyn bizdiń Saran zaýytynan shyqqan kóliktermen qamtımyz dep josparlap otyrmyz. Zamanaýı jaqsy avtobýstar bolady», - dep túsindirdi Jeńis Qasymbek.