Qaraǵandyda atyshýly attraktsıondaǵy ólimge qatysty nusqaýshy sotta jaýap berdi

QARAǴANDY. QazAqparat – Qaraǵandyda roýp-djampıngtegi kisi ólimine qatysty sot otyrysy jalǵasyp jatyr. Ótken jyly 10 qazanda qaza tapqan 34 jastaǵy Evgenııa Leontevanyń ólimine kánili dep aıyptalǵan attraktsıon nusqaýshysy sotta óz aıǵaqtaryn keltirdi, dep habarlaıdy QazAqparat tilshisi.

Sottalýshy Aleksandr Mýznıkas ózine taǵylǵan aıyppen kelispeıtinin aıtty.

«Maǵan Qylmystyq kodekstiń 306-bap, 3-bólimi boıynsha aıyp taǵyp otyr. Men ne uıymdastyrdym, ne shyǵardym? Meniń fırma ıesi emestigimdi túsiný úshin zańgerlik bilimniń qajeti joq. Árıne, joqqa shyǵarmaımyn, múmkin bul jerde meniń kinám bar shyǵar, biraq bul bap boıynsha emes! Bul jerde «Fly Kazakhstan» JShS qyzmet kórsetkenin, ol úshin aqy alǵanyn, barlyǵyny keliskenin jáne is-sharalar uıymdastyrǵanyn taǵy da qaıtalaǵym keledi. Nelikten jarty jyl ishinde tergeýshiler dırektordan esh jaýap alǵan joq? Іs materıaldarynda barlyq jerde «nusqaýshy», «jaýapty nusqaýshy», «uıymdastyrýshy» dep jazylady. Nusqaýshy – qujatpen rastalǵan arnaıy bilimi bolýy tıis sertıfıkattalǵan maman. Іste ony rastaıtyn bir de bir qujat joq. Men qalaı nusqaýshy bola alamyn? Іste meniń qatysymdy dáleldeıtin bir de bir qujat joq. Jábirlenýshilerge qaıǵyryp kóńil aıtamyn, biraq bul oqıǵaǵa nege men jaýap berýim kerek?»- dedi Aleksandr Mýznıkas.

Sondaı-aq, ol «Fly Kazakhstan» JShS-ne zańdy qatysy joq ekenin atap ótti. Aleksandr ol jerde eshqashan jumys istemegenin, jaýapty nusqaýshy laýazymyna taǵaıyndaý týraly buıryqqa qol qoımaǵanyn jáne Leontevamen nemese basqa bireýmen birjolǵy qyzmet kórsetý týraly kelisim jasamaǵanyn, klıentterden aqsha almaǵanyn aıtty.

Degenmen, ol sol kúni attraktsıonda bolǵanyn joqqa shyǵarmaıdy. Aleksandrdyń aıtýynsha, sol kúni ózi de tarzankadan sekirmek bolǵan.

Olar qonaq úıdiń tóbesine jabdyqtar daıyndaǵan kezde sekirýge tórt adam kelgen.

Sondaı-aq, sottalýshy tejeý júıesin bekitetin tómengi nusqaýshynyń qateligin atap ótti.

«Men arqandy kótere bastadym. Osy kezde tómendegi nusqaýshy Lev Glýhov kelesi sekirýge tejegish júıesin birden daıyndaýy kerek edi. Men onyń qaıda ketip qalǵanyn múldem túsinbeımin. Qalaısha óz ornyn tastap, bazanyń qozǵalmaly bóligin qaraýsyz qaldyrǵanyn bilmeımin»,- dedi Aleksandr Mýznıkas.

Kelesi otyrysta taraptar jaryssóz ótkizedi.

Eske sala keteıik, qaıǵyly oqıǵa ótken jyldyń 10 qazanynda bolǵan.

Roýp-djampıng nusqaýshysy kúdikke ilindi. Oǵan Qylmystyq kodekstiń 306-babynyń 3-bóligi boıynsha aıyp taǵyldy.