Qaraǵandyda 18 jasqa tolmaǵan balalar men jasóspirimder avtobýsta tegin júre alady

ASTANA. QazAqparat - Qaraǵandyda 18 jasqa deıingi balalar men jasóspirimder úshin qalalyq kólikte jol júrý tegin bolady, dep habarlaıdy oblystyq ákimdiktiń baspasóz qyzmeti.

Qaraǵandy oblysynyń ákimi Ermaǵanbet Bólekpaev bul máseleni pysyqtaýdy tapsyrdy. Bul shara otbasylarǵa, ásirese kóp balaly otbasylarǵa úlken qoldaý bolyp tabylady.

– Qaraǵandyda 7 jastan 18 jasqa deıingi 110 myńǵa jýyq turǵyn bar. Avtobýstardy jańartý men elektrondy bıletterdiń engizilýine baılanysty men oqýshylar úshin Qaraǵandy boıynsha tegin jol júrýdi qamtamasyz etýdi tapsyrdym, – dedi Ermaǵanbet Bólekpaev.

Óńir basshysy óziniń sheshimi týraly № 44 apatty mekteptiń pedagogıkalyq ujymymen jáne oqýshylarynyń ata-analarymen kezdesý barysynda habarlady.

1948 jylǵy ǵımarat qalpyna keltirýge kelmeıdi. Onyń ornyna jańa oqý ornyn salý josparlanýda. Oqýshylar men muǵalimder № 64 mektepke aýystyryldy. Ol 600 adamǵa arnalǵan, sondyqtan oryn tapshylyǵy joq.

Foto: gov.kz