Qaraǵandy polıtseıleri bank klıentteriniń atyna 57 nesıe rásimdegen alaıaqty ustady
Qaladaǵy bankterdiń biriniń menedjeri klıentterdiń belgili bir sanattaryna nesıe rásimdep otyrǵany anyqtaldy. Osylaısha, qyzmetker 57 banktik operatsııa ótkizip úlgergen.
«2020 jyldyń 10 aqpanynda Qaraǵandy oblysynyń Polıtsııa departamentine Halyq banki bólimsheleriniń biriniń aǵa menedjeri tarapynan 19 mıllonnan astam teńgege alaıaqtyq jasaý faktisi boıynsha habarlama kelip tústi. Qylmystyq isti zertteý barysynda kúdikti óziniń qyzmettik jaǵdaıyn paıdalana otyryp, 57 nesıelik qaryz resimdegeni jáne olardy óteý úshin úshinshi tulǵalardyń shottaryn paıdalanǵany anyqtaldy, barlyǵy 232 shot boldy. Sonymen qatar, osy aqshany alý úshin klıentterge plastıkalyq kartalaryn jasaǵan jáne qaıta shyǵarǵan. 2020 jyldyń 15 aqpanynda atalǵan fakt QR QK-niń 1-4-tarmaǵynyń 190-babynyń 3-bóligi boıynsha sotqa deıingi tergeýdiń biryńǵaı tizilimine tirkeldi, ıaǵnı alaıaqtyq, aldaý jolymen bóten múlikti urlaý, óziniń qyzmettik jaǵdaıyn birneshe márte paıdalana otyryp, iri mólsherde alaıaqtyqqa barý», - deıdi Kırov polıtsııa bóliminiń aǵa tergeýshisi Elena Frolova.
Bank menedjeri sottaldy jáne oǵan 4,6 jyl shartty merzim berildi.
Aǵa tergeýshiniń aıtýynsha, mundaı fakt olardyń tájirıbesinde alǵash ret bolǵan. Alaıda, úshinshi tulǵalarǵa belgisiz breýler nesıe rásimdeýge baılanysty alaıaqtyq derekteri kóptep kezdesedi.
«Negizinen ıntrenettegi urlyq oqıǵalary jıilep ketti. Árıne, halyq arasynda jeke kýálikteri, sonyń ishinde plastıkalyq kartochkalary, shot nómirleri týraly málimetterdi bermeý kerektigi týraly túsindirý jumystary júrgizilýde. Sondaı-aq, ózderin bank qyzmetkeri retinde tanystyryp, adamdardy aldap, azamattardyń ózderi jeke kýálikteri týraly málimetterdi, plastıkalyq kartalardyń nómirlerin beretin jaǵdaılar jıilep ketti», - dedi Elena Frolova.
Mundaı jaǵdaılarda tártip saqshylary bankke baryp, qajet bolǵan jaǵdaıda barlyq aqparatty sol jerde berýge keńes beredi. Eger bankke qajet bolmasa, jeke kýálikter men plastıkalyq kartalar týraly málimetterdi eshkimge berýdiń qajeti joq.
