Qaraǵandy oblysynyń joldarynda 200-den astam adam qutqaryldy

QARAǴANDY. QazAqparat – Qaraǵandy oblysynda qarly boran saldarynan barlyq trassalar jabyldy. Sońǵy táýlikte Tótenshe jaǵdaılar departamenti, jol polıtsııasy jáne jergilikti atqarýshy organdardyń qyzmetkerleri joldarda turyp qalǵan kólikterden adamdardy qutqarý boıynsha evakýatsııalyq jumystar júrgizýde, dep habarlaıdy QazAqparat tilshisi.

3 qańtar kúni saǵat 12:30-dan bastap Qaraǵandy oblysynyń 7 aýdanynda avtojoldardyń 9 ýchaskesinde qar qursaýynda qalǵan 80 jeńil avtokólikten 202 adam qutqarylyp, jaqyn eldi mekenderge jetkizildi. Qutqarylǵandar qatarynda 43 bala boldy. Apattyq-qutqarý jumystaryna TJD, jergilikti polıtsııa qyzmeti, jergilikti atqarýshy organdar men jol qyzmetteri jumyldyryldy. Qutqarylǵandar medıtsınalyq kómekti qajet etpedi.

Sondaı-aq, qutqarýshylar Aqtaý kentinen úsh júkti áıeldi joǵary ótimdi tehnıkamen evakýatsııalady. Áıelder Temirtaý qalasyna jetkizildi.

«Qaraǵandy oblysynyń aýmaǵynda aýa raıyna baılanysty eskertý jarııalandy. Qazirgi ýaqytta aýa-raıynyń nasharlaýyna baılanysty (qar, boran, ekpindi jel, kórinýdi shekteý) respýblıkalyq mańyzy bar avtojoldardyń 10 ýchaskesinde qozǵalys toqtatyldy»,-delingen habarlamada.

Avtojoldardyń jabyq ýchaskelerinde beketter uıymdastyryldy, onda 80 kólikte 167 adam joldyń ashylýyn kútip otyr.

Qaraǵandy oblysy TJD qyzmetkerleri qaýipsizdik talaptaryn qatań úusanýǵa shaqyrady:

- eldi mekenderden tys jerlerge shyqpaý;

- avtojoldardyń jabylǵan jol ýchaskelerinde kólik quraldary keptelisin boldyrmaý;

- múmkindiginshe eldi mekenderde, kempıngterde, jol boıyndaǵy dámhanalarda kútý.

Aýa-raıynyń ózgerýi jáne avtojoldardyń jaı-kúıi týraly jedel aqparat «Dármen» mobıldi qosymshasynda, TJD-nyń áleýmettik jelilerdegi resmı paraqshalarynda qoljetimdi.

Barlyq oqıǵalar men TJ faktileri týraly 112 nemese (8-7212) 43-36-36, 43-37-37 telefondaryna habarlasýǵa bolady.

Foto: Qaraǵandy oblysy TJD baspasóz qyzmeti