Qaraǵandy oblysynyń oqýshylary tórtinshi toqsanda qalaı oqıdy

QARAǴANDY. QazAqparat – 1 sáýirden bastap Qaraǵandy oblysynda mektepke deıingi bilim berý uıymdarynyń, onyń ishinde toptaǵy bala sany 25 adamnan aspaıtyn shaǵyn ortalyqtardyń qyzmeti qaıta jandanady. Alaıda «qyzyl» aımaqta ornalasqan Qaraǵandy, Prıozersk, Shahtınsk qalalary men Ulytaý aýdanynda balabaqshalarda kezekshi toptar ǵana jumys isteıdi, dep habarlaıdy QazAqparat tilshisi.

Bul týraly jáne mektep oqýshylarynyń tórtinshi toqsanda qalaı oqıtyny jaıly óńirlik kommýnıkatsııalar qyzmeti alańynda ótken onlaın brıfıngte bilim basqarmasynyń basshysy Gúlsim Qojahmetova aıtyp berdi.

QR Bas memlekettik sanıtar dárigeriniń qaýlysyna sáıkes, eger aımaqtar koronavırýstyń taralý qarqyny boıynsha «jasyl» jáne «sary» aımaqta bolsa, onda barlyq oqýshylar oqytýdyń aralas formatyna kóshedi, onda pánderdiń 70% shtattyq rejımde oqytylady.

Ol - matematıka, tilder, fızıka, hımııa, tarıh, geografııa, bıologııa, dene shynyqtyrý pánderi. Al qalǵan 30% qashyqtyqtan ótedi.

Oǵan ınformatıka, quqyq negizderi, ózin-ózi taný, kórkem eńbek, grafıka jáne jobalaý, kásipkerlik pen bıznes negizderi kiredi.

Synyptaǵy bala sany 25 adamnan aspaýy tıis.

«Bul oqytý formaty oblystyń Qaraǵandy, Prıozersk, Shahtınsk qalalary jáne Ulytaý aýdanynan basqa barlyq óńirine taralady. Al osy tórt eldi mekende sabaqtar ózgerissiz ótedi, ıaǵnı oqý 1, 2, 3, 4, 5, 9, 11 synyptarda aralas rejımde bolady. 6, 7, 8, 10 synyp oqýshylary qashyqtan bilim alýdy jalǵastyrady», - dedi Gúlsim Qojahmetova.

Oqý protsesi «bir synyp - bir kabınet» qaǵıdaty boıynsha uıymdastyrylady. Sabaqtyń uzaqtyǵy - 40 mınýt, sanıtarlyq talaptardy saqtaı otyryp ótkiziledi.

Balalar sabaqqa uqypty jáne yńǵaıly kıimmen qatysa alady. Mektep formasy mindetti emes.

«Jasyl» jáne «sary» aımaqta dástúrli oqytý formatymen bilim beretin mektepterde oqýshylar óz synybynda betperdesiz otyra alady.

Dástúrli formatta oqýdy quramynda 300-ge deıin oqýshysy bar, synypta 25 adamnan aspaıtyn Oblystyń 279 mektebi jalǵastyrady.

Qaraǵandy oblysynda barlyǵy 505 mektep bar, onda 204 499 oqýshy oqıdy.

Bilim salasyndaǵy olqylyqtardyń ornyn toltyrý jumysy da jalǵasady. Osy maqsatta sabaqtan tys ýaqytta 15 adamnan aspaıtyn toptarda jeke sabaqtar ótkiziledi.

Mektepterde yńǵaıly keste jasaldy. Sabaq arasyndaǵy ózgerister ártúrli ýaqytta uıymdastyrylǵan.

Barlyq kireberister men shyǵý esikteri ashylǵan, aýysymdar men ishki aýysýlar sany artqan.

Mektep ashanalarynyń, mamandandyrylǵan mektep-ınternattardyń jáne mektep-ınternattardyń jumysy aýmaqtyq bas memlekettik sanıtar dáriger kelisimi boıynsha jalǵasady.

Erekshe balalarǵa arnalǵan arnaıy mektep-ınternatta oqý protsesi sanıtarııalyq talaptardy qatań saqtaı otyryp, aralas formatta qaıta bastalady.

Basqa qaladan kelgen balalar ata-anasynyń qalaýy boıynsha oqýdy qashyqtan bilim alý formatynda jalǵastyra alatynyn atap ótken jón.

Tehnıkalyq jáne kásiptik bilim berýge toqtalar bolsaq, shtattyq rejımde bilim berý kolledjderdiń birinshi kýrs stýdentteri úshin uıymdastyrylady, qalǵany aralas formatta oqýdy jalǵastyrady.

Bitirýshi top stýdentteri úshin shtattyq rejımde dıplom jobalary men biliktilik emtıhandary boıynsha jeke konsýltatsııa ótkiziledi.

Oqytýdy uıymdastyrý boıynsha suraqtarmen bilim basqarmasyna jedel jeli telefondary: 25-25-02 jáne 8-747-491-12-91, sondaı-aq telegram-arna arqyly habarlasýǵa bolady.