Qaraǵandy oblysynyń qaı qalalary birinshi kezekte gazdandyrylady

QARAǴANDY. QazAqparat - Qaraǵandy oblysynda «Saryarqa» magıstraldy gaz qubyryn tartý boıynsha óńirdegi úsh iri qala - Qaraǵandy, Jezqazǵan jáne Temirtaýda gazdandyrý jobasy ázirlenýde, dep habarlaıdy QazAqparat tilshisi.

Óńirde barlyǵy 120 eldi mekendi gazdandyrý josparlanyp otyr.

«Oblys ákimdiginiń tapsyrmasy boıynsha biz Jezqazǵan, Qaraǵandy jáne Temirtaý boıynsha úsh úlken jobany ázirleımiz. Tek osy qalalar boıynsha ǵana 1 500 shaqyrymǵa jýyq qubyr tartylady. Gazdandyrý boıynsha 10 kezek pen 35 iske qosý kesheni josparlanýda. Búgingi tańda qurylys-montaj jumystary bastaldy. Qubyrlardy satyp alýǵa kelisimshart boıynsha jetkizý iske asyrylýda», - dep málimdedi «KATEK» JShS Bas dırektory Qundyz Núpov.

Oblystyq energetıka basqarmasynyń aqparaty boıynsha, qalalardy gazdandyrý shemalary kelisildi. Qaraǵandyda birinshi kezekte Mıhaılovka aýdanynyń jeke sektoryn gazdandyrý josparlanýda - ol 13 kóshe, 1 900-ge jýyq úı. Temirtaýda gazdandyrý Saryarqa kóshesinen (burynǵy Stepan Razın), Jezqazǵanda - Prıstantsıonnyı kóshesi jáne Talap kentinen bastalady.

Gazdandyrýdyń basty artyqshylyǵy - ekologııany jaqsartý.

«Gaz eń aldymen halyq úshin paıdaly. Ekinshiden, shaǵyn jáne orta bıznes úshin paıdaly, jobaǵa jergilikti óndirýshiler qatysa alady. Jáne qazirdiń ózinde jaqsy mysaldar da bar. «Bemer» qaraǵandylyq kásiporny bekitkish armatýrany jetkizýge kelisimshart jasady. «Saryarqa» EEA aýmaǵynda gaz jabdyqtaryn - aspaptar men eseptegishterdi óndirý boıynsha ınvestıtsııalyq jobany iske asyratyn jańa qatysýshy tirkeldi. Biraq biz osymen shektelip qalmaı, odan ári jyljýymyz kerek», - dedi Qaraǵandy oblysynyń ákimi Erlan Qoshanov.

Óńir basshysy bul máseleni qazaqstandyq qamtý jónindegi komıssııada egjeı-tegjeıli qaraýdy tapsyrdy.

«KATEK» basshysy Qazaqstan tarıhynda alǵash ret gaz salasynda otandyq bekitý armatýrasy paıdalanylatynyn atap ótti. Onyń pikirinshe, Qaraǵandy oblysynda gaz jobasyndaǵy qazaqstandyq qamtý jaǵynan damyǵan ónerkásip pen mamandardyń bolýy arqasynda úlken múmkindikter týady.

Qaraǵandy kásipkerleri jobaǵa qurylys kezeńinde de, óńirdi gazdandyrý protsesinde de qatysýǵa daıyn ekendikterin málimdedi. Olardyń aıtýynsha, jergilikti jerde gaz qazandyqtary, plıtalar, esepteýishter jáne basqa da jabdyqtar óndirisin uıymdastyrýǵa bolady. Bul óz kezeginde óńirge qosymsha ınvestıtsııalar, jańa jumys oryndaryn, salyqtyq túsimderin beredi, dep atap ótti jıynǵa qatysýshylar.