Qaraǵandy oblysynyń ákimi saılaýda daýys berdi

QARAǴANDY. QazAqparat – Qaraǵandy oblysynyń ákimi Jeńis Qasymbek Parlament Májilisi men máslıhat saılaýynda daýys berdi. Aımaq basshysy tańerteń №102 mektep-gımnazııasynda ornalasqan №42 saılaý ýchaskesine keldi, dep habarlaıdy QazAqparat tilshisi.

Saılaý komıtetiniń tóraǵasy Lázzat Dilmaǵambetovanyń aıtýynsha, tańǵy jetiden bastap munda 30 adam daýys bergen. Ýchaskede barlyǵy 2 700 saılaýshy tirkelgen. Úıden daýys berýge úsh ótinim kelip tústi.

«Saılaý barlyq sanıtarlyq normalardy saqtaı otyryp ótýde, bizdiń ýchaskege ashylǵannan beri 30-dan astam adam keldi. Úsh adam densaýlyǵyna baılanysty daýys berýge úıinen qatysýǵa nıet bildirdi. Olarǵa saılaý komıtetiniń músheleri saǵat 12.00-den bastap bara bastaıdy», - dedi Lázzat Dilmaǵambetova.

Jeńis Qasymbektiń aıtýynsha saılaý kúrdeli jaǵdaıda ótip jatyr.

«Búgin elimiz úshin mańyzdy kún. Oblys boıynsha 700-den astam ýchaske ashyldy, onda árbir saılaýshy quqyqtaryn paıdalanyp, óz tańdaýyn jasaı alady. Atqarýshy organdar tarapynan pandemııa jaǵdaıynda daýys berý úshin qaýipsiz sanıtarlyq jaǵdaı jasalǵan», - dep atap ótti aımaq basshysy.

Aıta ketsek, Qaraǵandy oblysynda 778 saılaý ýchaskesi jumys isteıdi. Saılaý komıssııalarynyń quramynda 5 509 adam bar. 920,4 myń saılaýshy tirkelgen. Saılaý protsesin halyqaralyq uıymdar men aımaqtyq qoǵamdyq birlestikterdiń baıqaýshylary qadaǵalaıdy. Saılaý ýchaskelerinde saıası partııalardyń 3 myńǵa jýyq senimdi ókilderi bar.