Qaraǵandy oblysyndaǵy joldarda 31 jylytý beketi uıymdastyryldy

QARAǴANDY. QazAqparat – Qaraǵandy oblysynda TJD jáne vedomstvolyq baǵynysty mekemelerdiń qyzmetkerleri qysqy kezeńde qaýipsizdikti qamtamasyz etý úshin joǵary daıyndyq rejımine aýystyryldy.

Bul týraly Óńirlik kommýnıkatsııalar qyzmetinde ótken brıfıngte aımaqtyń TJD bastyǵy Murat Qatpanov aıtyp berdi, dep habarlaıdy QazAqparat tilshisi.

Qaraǵandy oblysynda qar kóshkini bolýy yqtımal 747 shaqyrym avtomobıl joldary kúsheıtilgen baqylaýǵa alyndy. 31 jylytý pýnkti men 6 trassalyq medıtsınalyq-qutqarý beketteriniń jumysy uıymdastyryldy.

«Óńirde uzyndyǵy 747 shaqyrym bolatyn 590 qar qalyń túsetin ýchaske bar. Bul avtojoldar baqylaýǵa alyndy», – dedi Murat Qatpanov.

Adamdardy evakýatsııalaý jáne boran men joldyń kórinýi qıyndaǵan kezde ýaqytsha ornalastyrý úshin jol boıyndaǵy servıstiń 355 nysany jumyldyrylatyn bolady. Bul 85 janarmaı quıý beketi, 160 tamaqtaný orny, 31 qonaq úı men kempıng, 79 baılanys pýnkti.

«Azamattarǵa aýa-raıy nasharlaǵan jaǵdaıda eldi mekenderden tys jerlerge jáne alys jolǵa, ásirese keshki jáne túngi ýaqytta saparlar men jaıaý júrýden bas tartý qajet ekenin eske salǵym keledi. Ata-analarǵa sabaqty toqtatý týraly aqparatty nazarda ustaýǵa shaǵyramyz. Júrgizýshiler kóliktiń jaı-kúıin muqııat tekserip, avtojoldardyń jaǵdaıy týraly aqparatty qadaǵalap otyrýy qajet», – dep qosty Murat Qatpanov.

Jalpy, Qaraǵandy oblysynda qysta TJ saldaryn joıý úshin barlyq qajetti tehnıka men jabdyqtar tolyq daıyn. TJ departamenti qysta jumys isteýge arnalǵan 76 birlik joǵary ótimdi jáne ınjenerlik tehnıka daıyndaldy.

Foto: gov.kz