Qaraǵandy oblysyndaǵy aýyl ákimi respýblıkalyq baıqaýda úzdik dep tanyldy
«Úzdik ashyq ákim» bolyp Qaraǵandy oblysy Nura aýdany Barshyn aýyldyq okrýginiń ákimi Záýre Muhanalıeva tanyldy, dep habarlaıdy QazAqparat tilshisi.
Jarys eki kezeń boıynsha ótti: aımaqtyq jáne respýblıkalyq.
«Óńirlik kezeńge qatysýshylar halyqtyń aýyldyq jerde turýyna qolaıly jaǵdaı jasaýǵa baǵyttalǵan jobalaryn qorǵady, ekonomıkalyq jáne áleýmettik áleýeti bar aýyldardy turaqty damytý jóninde usynystar engizdi.
Ekinshi kezeńde aýyl ákimderiniń sıtýatsııalyq keıster arqyly problemalyq jaǵdaılar boıynsha tájirıbelik mindetterdi sheshý qabileti baǵalandy», — dep habarlady QR Memlekettik qyzmet isteri agenttigi.
Záýre Muhanalıeva 2016 jyldan beri Barshyn aýyldyq okrýginiń ákimi bolyp jumys isteıdi.
«Kelesi jyly men zeınetke shyǵamyn. Sizdiń jumysqa qalaı kelgenińiz emes, odan qalaı ketetinińiz mańyzdy degen sóz bar. Oblystyq deńgeıde «Teri ıleý jáne jún óńdeý» taqyrybynda óz jobamdy qorǵadym. Al respýblıkalyq kezeńge biz onlaın qatysyp, keıster boıynsha suraqtarǵa jaýap berdik. Álıhan Bókeıhanov: Halyqqa qyzmet etý bilimde emes, minezde degen. Meniń minezim ashyq, kópshilmin.
Bul qasıetter maǵan turǵyndarmen jumys isteýde kóp kómektesedi. Bizde 803 adam turady. Ákimder halyq arasynda jáne halyqpen jumys isteýi tıis. Adamdarmen ortaq til tabysý úshin belgili bir dárejede psıholog bolýyńyz kerek. Bolashaq jas ákimder osyny eskeredi dep senemin», — deıdi Zaýre Muhanalıeva.
Konkýrsqa barlyǵy júzge jýyq aýyl jáne aýyldyq okrýg basshylary qatysty.
Túrkistan oblysy Shardara aýdany Jaýshyqum aýyldyq okrýginiń basshysy Nurbaqyt Nurseıtov úzdik ákim atandy.
Konkýrs jeńimpazdary men nomınatsııa ıegerleri memlekettik qyzmet isteri agenttigi tóraǵasynyń Qurmet gramotalarymen marapattaldy.
Foto: Qaraǵandy oblysynyń ákimdigi
