Qaraǵandy oblysynda jyl basynan beri óndiris barysynda 16 adam qaza tapqan
«2021 jyldyń bes aıynda 96 jazataıym oqıǵa boldy, onda 122 adam zardap shekti, onyń ishinde 16 adam qaıtys bolǵan. Jazataıym oqıǵalardyń eń kóbi taý-ken metallýrgııa, kómir jáne qurylys salalarynda bold. Negizgi bóligi «ArselorMıttal Temirtaý» AQ, «Qazaqmys» korporatsııasy» JShS, «Shubarkól Kómir» AQ, «Altyn Komir Service» JShS jáne t. b. iri kásiporyndarda tirkelgen», – dep habarlady eńbek ınspektsııasy jónindegi basqarma basshysy Irına Lıýbarskaıa onlaın rejımde ótken apparattyq keńeste.
Negizgi sebepterdiń qatarynda baıandamashy qaýipsiz eńbek jaǵdaılaryn qamtamasyz etýdegi olqylyqtardy, qaýipsizdik tehnıkasyn saqtamaýdy, óndiristi jańǵyrtý jetkiliksiz júrgiziletinin atap ótti.
Jyl basynan beri polıtsııa organdaryna jumys istep jatqan jazataıym oqıǵalardy arnaıy tergeýge 110 materıal jiberildi.
Basqarma basshysynyń málimetinshe, ónerkásip kásiporyndarynda 319 tekserý júrgizilip, nátıjesinde 255 buzýshylyq anyqtaldy. Búgingi tańda olardyń barlyǵy joıyldy. 40 zańdy jáne laýazymdy tulǵa ákimshilik jazaǵa tartyldy, aıyppuldardyń jalpy somasy 8,9 mln teńgeni qurady.
Irına Lıýbarskaıa óńirde 2019-2023 jyldarǵa arnalǵan óndiristik jaraqattanýdy jáne eńbek jaǵdaılary zııandy jumys oryndaryn azaıtý jónindegi Jol kartasyn jáne «Qaýipsiz eńbek» baǵdarlamasyn iske asyrý týraly aıtyp berdi.
Oblysta 160 iri kásiporyn eńbek qaýipsizdigi jáne eńbekti qorǵaý boıynsha halyqaralyq jáne ulttyq standarttardy engizgen (OHSAS 18001, HEU-EQBJ). Bes kásiporyn Vision Zero baǵdarlamasyna qatysady, 31 kásiporynǵa «Halyqtyq baqylaý» jobasy engizildi. Eńbek qaýipsizdigi jáne eńbekti qorǵaý jónindegi 1 128 óndiristik keńes jumys isteıdi.
«Bizdiń óńirimizde qaýipsiz eńbek jaǵdaılaryn qamtamasyz etý máseleleri árdaıym ózekti. Ókinishke qaraı, ereje buzýshylyqtar jumys berýshiler de, jumysshylardyń tarapynan da jiberilip jatady. Óndiristik jaraqattanýdy azaıtý boıynsha sharalardy kúsheıtip, qaýipsizdik erejelerin kóbirek túsindirý qajet», – dep atap ótti oblys ákimi Jeńis Qasymbek.
Óńir basshysy jazataıym oqıǵalar bolǵan árbir kásiporynda eńbek jaǵdaıyn jaqsartý boıynsha naqty jospar ázirleýdi tapsyrdy. Barlyq óndiris kásiporyndarynda kásibı táýekelderdi baǵalaý jáne olardy azaıtý boıynsha sharalar qabyldaý qajet.
