Qaraǵandy oblysynda joǵary surypty ák óndiriletin bolady

QARAǴANDY. QazAqparat - Osakarov aýdanynda joǵary sapaly ák óndiretin zaýyttyń qurylysy bastaldy. Bolashaq kásiporyn óz ónimin tek ishki naryqqa ǵana emes, eksportqa da jetkizetin bolady, dep habarlaıdy QazAqparat Qaraǵandy oblysy ákimdiginiń baspasóz qyzmetine silteme jasap.

Zaýytty «Saryopan Operating» JShS salady. Tehnıkalyq seriktes Carmeuse Group belgııalyq transulttyq kompanııa bolmaq. Jobalyq qýaty – jylyna 300 myń tonna daıyn ónim, keleshekte bul kórsetkish 600-ge deıin ulǵaıtylady. 300-ge jýyq jumys orny ashylady.

– Bul óńirge 30 mıllıard teńgege jýyq ınvestıtsııa, jańa jumys oryndary, jańa tehnologııalar ákeletin mańyzdy joba. Eń bastysy – zaýyt qara jáne tústi metallýrgııaǵa, hımııa ónerkásibine jáne basqa da salalarǵa qajetti ónim shyǵaratyn bolady. Bul óndiris Osakarov aýdany úshin jańa ósý núktesi bolatynyna senimdimin, – dep atap ótti Qaraǵandy oblysynyń ákimi Jeńis Qasymbek.

Birinshi surypty ák óndirý kesheni otandyq qara jáne tústi metallýrgııa, shyny ónerkásibi kásiporyndarynyń qajettilikterin qamtamasyz etedi.

– Saryopan ken orny metallýrgııalyq ák óndirýge múmkindik beretindigimen erekshe, - deıdi SaryopanOperating tehnıkalyq dırektory Eskendir Qoldasov.

– Karer ashyq tásilmen ázirlenetin bolady. Taý massasy birden eki fraktsııaly óndiriske túsedi. Úlken bóligi – qara metallýrgııada, al kishisi – tústi.

Zaýyt áktiń úsh túrin shyǵarady: kesek, usaqtalǵan jáne gıdrattalǵan. Negizgi tutynýshylar «ArselorMıttal Temirtaý», «Qazaqmys», «Qazhrom» jáne KAZ Minerals kompanııalary bolady.

Kásiporyndy iske qosý 2022 jyldyń tórtinshi toqsanyna josparlanǵan.

Óndiristik ınfraqurylym zaýytqa «Bıznestiń jol kartasy – 2025» memlekettik baǵdarlamasy boıynsha jetkizilýde.