Qaraǵandy oblysynda turǵyn úı qurylysy 10,3 paıyzǵa artty

QARAǴANDY. QazAqparat – Qaraǵandy oblysynda on aıda 391,6 myń sharshy metr turǵyn úı salyndy. Bul ótken jyldyń sáıkes kezeńimen salystyrǵanda 10,3%-ǵa artyq, dep habarlaıdy QazAqparat tilshisi.

Oblys ákimi Jeńis Qasymbek onlaın rejımde ótken Úkimet otyrysynda óńirdiń áleýmettik-ekonomıkalyq damýy týraly baıandady.

«Ónerkásiptiń naqty kólem ındeksi 102,4%-dy, aqshalaı mánde - 2,4 trln teńgeni qurady, bul ótken jylmen salystyrǵanda 11,5%-ǵa artyq. Oń dınamıka óńdeý ónerkásibiniń 4,6%-ǵa nemese 1,9 trln teńgege ósýi esebinen qamtamasyz etildi. Ósim barlyq salalarda baıqalady: tústi metallýrgııada - 6,9%-ǵa, qara metallýrgııada - 5%-ǵa, hımııa ónerkásibinde - 5,1%-ǵa, Tamaq ónimderi óndirisinde -15,2%-ǵa, rezeńke jáne plastmassa buıymdary óndirisinde - 4,7%-ǵa, farmatsevtıkada - 3,1 ese», - dep habarlady óńir basshysy.

Júıe quraýshy kásiporyndar turaqty jumys isteıdi. Jalpaq ılek shyǵarý 20,1%-ǵa artyp, 2,1 mln tonnany qurady. Mys óndirisiniń kórsetkishi - 334,4 myń tonna, ósim - 7,3%.

Aýyl sharýashylyǵynda 4,6% ósimmen 341,4 mlrd teńgeniń ónimi óndirildi.

On aıda 529,7 mlrd teńge ınvestıtsııa salyndy. Bul somanyń 83%-yn jeke ınvestıtsııalar, 34,2%-yn sheteldik ınvestıtsııalar alady.

Oblysta 2 trln teńge somasyna, 12 myńnan astam jańa jumys oryndaryn qurýmen 45 iri ınvestıtsııalyq joba iske asyrylýda. 2020 jylǵa 11 jobany iske qosý josparlanǵan, onyń ishinde jalpy quny 168,5 mlrd teńge bolatyn segiz joba iske qosyldy. Olardyń qatarynda altyn óndirý fabrıkasy, tehnıkalyq gaz óndirý zaýyty, kóterme-logıstıkalyq ortalyq jáne t. b. bar.

Jeltoqsan aıynda Sarandaǵy burynǵy RTB zaýyty aýmaǵynda Yutong qytaılyq kompanııasymen birlesip jolaýshylar avtobýstary óndirisin iske qosý josparlanýda. Jobanyń quny - 22,1 mlrd teńge, 440-tan astam jumys ornyn qurýmen. Josparlanǵan qýattylyǵy - jylyna 1 200 avtobýs.

Osy alańda reseılik «Tatneft» kompanııasymen birlesip avtomobıl shınalaryn óndirý boıynsha iri jobany iske asyrý bastaldy. Onyń iske qosylýy 2020 jylǵa josparlanǵan. Investıtsııalar 114,4 mlrd teńgeni quraıdy. Myńnan astam jumys orny ashylady.

«Jalpy, jyl qorytyndysy boıynsha JÓÓ-niń oń dınamıkasyn ónerkásipte 3%-ǵa, aýyl sharýashylyǵy óniminiń jalpy kólemin - 5%-ǵa, ishki saýdada 0,1%-ǵa ósý esebinen qamtamasyz etý mindetin qoıamyz», - dep atap ótti Jeńis Qasymbek.