Qaraǵandy oblysynda sý tasý qaýpi baıqalmaıdy - óńir basshysy aımaqtardy barlap shyqty

QARAǴANDY. QazAqparat – Qaraǵandy oblysynyń ákimi Ermaǵanbet Bólekpaev sý júrý qaýpi bar ýchaskelerdi tekserdi. Óńirde sý tasqynyna qatysty jaǵdaı turaqty.

Kosmomonıtorıngtiń málimetinshe, búginde óńir aýmaǵynyń 25%-yn qar basyp jatyr, dep habarlaıdy QazAqparat tilshisi.

Qaraǵandy oblysynyń ákimi Ermaǵanbet Bólekpaev TJD bastyǵy Murat Qatpanovpen birge Nura jáne Sherýbaı-Nura ózenderiniń arnasy boıynsha Qarqaraly, Buqar Jyraý, Shet jáne Abaı aýdandarynyń sý tasý qaýpi bar ýchaskelerin kórdi. Eldi mekenderdiń janyndaǵy gıdrotehnıkalyq qurylystar, topyraq úıindileri men bógetterdiń jaıı-kúıi zertteldi.

«Sý tasqyny qaýpi baıqalmaıdy. Aqtoǵaı jáne Shet aýdandarynyń soltústik aýmaqtary, Buqar jyraý aýdanynyń ońtústik-batys bóligi, Osakarov aýdanynyń batys bóligi jáne Nura ózeniniń arnasy boıynsha Nura aýdanynyń soltústik-shyǵys bóliginiń azdaǵan bóligin áli qar basyp jatyr. Qardyń tez erýine naýryzdyń basyndaǵy kúnniń jylynýy, jaýyn-shashyn, qalypty deńgeıden tómen kúzgi ylǵaldylyq jaqsy áser etti. Qardyń belsendi erip, súzilýi men jerge sińýi baıqalyp otyr. Ózenderdiń arnasynan asýy men sý mólsheriniń artý jaǵdaıy tirkelgen joq», – dedi Murat Qatpanov.

Oblys ózenderinde muzdy usaqtaý, burǵylaý jáne kesý jumystary júrgizildi. Buqar jyraý, Osakarov, Qarqaraly jáne Aqtoǵaı aýdandarynda jalpy aýdany 7000 sharshy metr bolatyn 17 ýchaske qamtyldy.

4845 sý ótkizý qubyrlaryn, 187 km kanaldar men aryqtardy, 463 kópirdi tazartý jumystary aıaqtaldy. 143 km sý burý transheıalary jasaldy.

Samarqan jáne Yntymaq sý qoımalarynan sý aǵyzý shtattyq rejımde ótip jatyr.

Sý tasqynyna qarsy jumystar jalǵasýda.