Qaraǵandy oblysynda Senat depýtattyǵyna 3 adam úmitker

QARAǴANDY. QazAqparat – Elimizdiń barlyq óńirinde Senat depýtattaryn saılaýǵa daıyndyq júrip jatyr. 13 qańtar saǵat 00:00-ge deıin úgit-nasıhat jumystary júrgizilip, kandıdattar saılaýshylar - máslıhat depýtattarymen kezdesedi. Tún jarymnan keıin tynyshtyq kúni jarııalanady. Qaraǵandy oblysynan usynylǵan kandıdattar jaıly tilshimiz baıandaıdy.

Qaraǵandy oblysynan Senat depýtattyǵyna 7 kandıdat usynylǵan bolatyn. Alaıda onyń tek úsheýi tirkeldi. Olar:

Óteshov Serik Balǵataıuly. Kandıdatýrasyn Nura jáne Osakarov aýdandarynyń máslıhattary usyndy.

S.Óteshov 1962 jyly Qaraǵandy oblysy Jańaarqa aýdany Atasý kentinde dúnıege kelgen.

Joǵary bilimi bar, E. A. Bóketov atyndaǵy Qaraǵandy memlekettik ýnıversıtetin «ekonomıst» mamandyǵy boıynsha bitirgen.

Eńbek jolyn 1981 jyly Jańaarqa aýdany Atasý aýylynda «Drýjba» sovhozynda avtogaraj slesari bolyp bastaǵan. 1989 jyldan bastap memlekettik qyzmette. Jezqazǵan oblystyq halyq depýtattary Keńesi atqarý komıteti qarjy bóliminiń bıýdjet bóliminiń aǵa ekonomısi boldy. Ár jyldary Jezqazǵan oblystyq qarjy basqarmasy basshysynyń jáne basshy orynbasarynyń mindetin atqarǵan.

Jezqazǵan oblystyq syrtqy ekonomıkalyq baılanystar komıtetiniń tóraǵasy boldy.

Jezqazǵan oblysy ákiminiń orynbasary qyzmetin atqardy.

Sondaı-aq Qaraǵandy oblystyq qarjy basqarmasynda basshylyq qyzmetter atqardy.

Qaraǵandy oblysy ákiminiń orynbasary boldy.

2017 jyldan bastap búgingi kúnge deıin – Qaraǵandy oblystyq máslıhatynyń hatshysy.

Shatohına Tatıana Nıkolaevna. Ózin-ózi usynǵan.

Tatıana Shatohına 1970 jyly Qaraǵandy qalasynda dúnıege kelgen.

Úsh joǵary bilimi bar: 1993 jyly E. A. Bóketov atyndaǵy QarMÝ-di; 1997 jyly QR Prezıdenti janyndaǵy Memlekettik basqarýdyń Ulttyq joǵary mektebin; 2015 jyly Almaty Ekonomıka jáne statıstıka akademııasyn bitirgen.

Eńbek jolyn 1988 jyly Qaraǵandy pedagogıka ınstıtýtynyń psıhologııa kafedrasynda zerthanashy bolyp bastaǵan.

Qaraǵandy qalasy Sovet aýdany QІJK «Mamandyq tańdaý negizderi» kýrsynyń oqytýshysy; Qaraǵandy qalasy Kırov aýdandyq ákimshiliginiń ishki saıasat jónindegi bas mamany, áleýmettik qorǵaý jónindegi maman; Qaraǵandy qalasy Kırov aýdany mádenıet, sport jáne jastar komıteti tóraǵasynyń orynbasary; Qaraǵandy qalasy ákimi apparatynyń ishki saıasat bóliminiń meńgerýshisi; Memlekettik qyzmetshiler men bilim berý qyzmetkerleriniń biliktiligin arttyrý jáne qaıta daıarlaý oblystyq ınstıtýtynyń Memlekettik basqarý kafedrasynyń meńgerýshi – prorektory; Qaraǵandy oblysy ákimi apparatynyń «Memlekettik qyzmetshilerdi qaıta daıarlaý jáne biliktiligin arttyrýdyń óńirlik ortalyǵy» KMQK dırektory; Qaraǵandy qalasy Qazybek bı aýdanynyń ákimi.

2020 jyldan bastap búgingi kúnge deıin - «Qaraǵandy oblysynyń Kásipodaq ortalyǵy» aýmaqtyq kásipodaqtar birlestigi tóraǵasynyń orynbasary.

Ábilov Murat Smaǵululy. Ózin-ózi usynǵan.

Murat Ábilov 1959 jyly Qaraǵandy qalasynda dúnıege kelgen. Qaraǵandy memlekettik ýnıversıtetin «zańger» mamandyǵy boıynsha bitirgen.

Eńbek jolyn 1982 jyly Temirtaý ishki ister bólimi tergeýshisiniń mindetin atqarýdan bastaǵan.

Qaraǵandy oblysy Metallýrgııa aýdany prokýratýrasynyń tergeýshisi; Qaraǵandy oblysy prokýratýrasynyń aǵa tergeýshisi; Qaraǵandy oblysy Nura aýdandyq sotynyń sýdıasy; Qaraǵandy oblysy Nura aýdandyq sotynyń jáne Qaraǵandy qalasy Kırov aýdandyq sotynyń tóraǵasy; Qaraǵandy oblysy Ádilet basqarmasynyń bastyǵy; Aqtóbe oblysy prokýrorynyń orynbasary; QR Bas prokýratýrasynyń Quqyqtyq statıstıka jáne arnaıy esepke alý komıteti tóraǵasynyń orynbasary; Qaraǵandy oblysy boıynsha Qaraǵandy oblysy prokýrorynyń birinshi orynbasary; Qaraǵandy oblysy jáne Astana qalasy Ádilet departamentiniń bastyǵy.

2018 jyldan bastap búgingi kúnge deıin – Qaraǵandy oblysy boıynsha jeke sot oryndaýshylarynyń óńirlik palatasynyń basshysy.

Esterińizge sala keteıik, Memleket basshysynyń Jarlyǵymen QR Parlamenti Senatynyń depýtattaryn saılaý 2023 jylǵy 14 qańtarǵa belgilendi.

Senatty qalyptastyrý tártibi QR Konstıtýtsııasynda aıqyndalǵan. Parlamenttiń joǵarǵy palatasynda ár oblystan, respýblıkalyq mańyzy bar qaladan jáne Astanadan eki adam usynylǵan. Senat depýtattary janama saılaý quqyǵy negizinde máslıhat depýtattarynyń jasyryn daýys berýimen saılanady. Senat depýtattarynyń ókilettik merzimi alty jyldy quraıdy. Bul rette, olardyń teń jartysy ár úsh jyl saıyn qaıta saılanady.