Qaraǵandy oblysynda óńdeý ónerkásibiniń kólemi 3%-ǵa ósti

QARAǴANDY. QazAqparat – Qaraǵandy oblysynda barlyq negizgi baǵyttar boıynsha áleýmettik-ekonomıkalyq damýdyń oń serpini saqtalýda. Bes aıda kútiletin nátıjeler onlaın rejımde ótken apparattyq keńeste talqylandy.

«Ónerkásip ónimderin óndirý jalpy somasy 1 trln 671,5 mlrd teńgege boljanyp otyr. Óńdeý ónerkásibinde 3%-ǵa ósý kútilýde. Atap aıtqanda, 20-dan 28%-ǵa deıingi deńgeıde shoıyn, jalpaq bolat prokaty, tazartylǵan mys óndirisi 1%-ǵa artady», – dep baıandady ekonomıka basqarmasynyń basshysy Azamat Muqanov.

Boljam boıynsha, bes aıda oblystyń negizgi kapıtalyna 13% ósimmen 257,8 mlrd teńge ınvestıtsııa salynýy tıis.

Qurylysta kólem 3%-ǵa ósedi dep kútilýde. Aldyn ala derekter boıynsha 195 myń sharshy metrge jýyq turǵyn úıdi paıdalanýǵa berý josparlanǵan – ótken jyldyń sáıkes kezeńimen salystyrǵanda bul kórsetkish 13,4%-ǵa artyq.

Aýyl sharýashylyq salasynyń mal sharýashylyǵynda turaqty ósim baıqalady. Jalpy alǵanda sala boıynsha oń dınamıka baıqalady.

Óńirde 90 myńnan astam shaǵyn jáne orta bıznes sýbektileri jumys isteıdi. Ótken jylmen salystyrǵanda olar 2,6%-ǵa artty.

«Jalpy, ótken jylmen salystyrǵanda ındıkatorlardyń kópshiligi oń dınamıka beredi. Ónerkásip, ásirese óńdeý sektory, qurylys, saýdada bes aıdyń qorytyndysy boıynsha ósim baıqalady. Pandemııaǵa baılanysty tabysy tómendegen qoǵamdyq kólik boıynsha kórsetkishterdi arttyramyz. Josparlanǵan ındıkatorlarǵa qol jetkizý boıynsha jumysty jandandyrý, salalardyń ósý qarqyny boıynsha barlyq sharalardy qabyldaý qajet. Barlyq baǵyttar boıynsha jumysty kúsheıtý kerek», – dep atap ótti oblys ákimi Jeńis Qasymbek.