Qaraǵandy oblysynda qysqy mal azyǵynyń 80 paıyzy daıyn

QARAǴANDY. QazAqparat – Qaraǵandy oblysynyń fermerleri mal azyǵyn daıyndaýdy jalǵastyryp jatyr. Búginde 80% jınaldy, dep habarlaıdy QazAqparat tilshisi.

Óńir basshysy Jeńis Qasymbek jemshóp daıyndaý naýqany máseleleri boıynsha onlaın-keńes ótkizdi.

«Búgingi kúni jospar boıynsha 2,3 mln tonna bolsa, 1 mln 860 myń tonna iri jem daıyndaldy, onyń ishinde 292,2 myń tonna kópjyldyq shóp, nemese belgilengen kólemniń 80%. Bul respýblıkadaǵy tórtinshi kórsetkish», – dedi Aýyl sharýashylyq basqarmasy basshysynyń mindetin atqarýshy Syrym Boshpanov.

Budan basqa, 6,5 myń tonna pishendeme, 1,5 myń tonna súrlem daıyndaldy.

Shóp shabý naýqanyna 30 myńǵa jýyq tehnıka jumyldyryldy.

Keńeste sondaı-aq Ulytaý aýdanyndaǵy tabıǵı órtterden zardap shekken fermerlerge qandaı kómek kórsetilgeni týraly aıtyldy.

Órtengen shabyndyq jerler úshin ótemaqy retinde taraptardyń kelisimi boıynsha bosalqy jerlerden jáne fermerlerdiń paıdalanylmaıtyn jerlerinen alańdar bólinedi. Órt kezinde qaza bolǵan mal úshin fermer 17 mln teńgege jýyq qarajat alady.

Memleket tarapynan shóp shabý naýqanyna qosymsha 3 myń tonna arzandatylǵan dızel otyny bólindi.

Shóp daıyndaýshylarmen 40%-dan astam mal shoǵyrlanǵan jeke qosalqy sharýashylyqtar úshin shóp baǵasynyń kóterilýine jol bermeý týraly memorandýmdarǵa qol qoıylady.

Máselelerdi jedel sheshý úshin óńirlik shtabtar jumys isteıdi.

«Jalpy jospar boıynsha jumys júrgizilýde. Kóptegen sharýashylyqtar alǵa jyljýda. Úsh aýdanda jańbyrdyń saldarynan artta qalý boldy, biraq qazir aýa-raıy qalypty, olar egin jınaýdy ýaqytynda aıaqtaı alady. Týyndaǵan máseleler jedel sheshilýde», – dep atap ótti Jeńis Qasymbek.