Qaraǵandy oblysynda balalardy tegin úıirmemen qamtýǵa 1,1 mlrd teńge bólindi
Qaraǵandy oblysynda qazirgi tańda 144 úıirme jumys isteıdi, onda 4806 bala qosymsha bilimdi tegin alady.
«Jan basyna shaqqandaǵy qarjylandyrý baǵdarlamasy boıynsha balalar halyq jáne zamanaýı bı, horeografııa, keskindeme, sýret salý, qýyrshaqtaný, kıim úlgileý, pishý jáne tigý, akterlik sheberlik, sahnalyq sóıleý, modeldik óner, ólketaný úıirmelerine qatysady, sondaı-aq ekskýrsovod-gıd bolýǵa, estradalyq vokalǵa, halyq ánine, dombyra shertýge úırenedi. Bul tolyq tizim emes. Shyǵarmashylyq tapsyrys boıynsha úıirmeler Qaraǵandy, Temirtaý, Shahtınsk jáne Saran qalalarynda jumys isteıdi», – dedi Qaraǵandy oblysynyń mádenıet, muraǵattar jáne qujattama basqarmasynan.
«Batyl júrek» jáne «Ýmnıtsy» qoǵamdyq qaıyrymdylyq qorynda múmkindigi shekteýli 25 bala sýret salý, kórkem sýret salý jáne músindeý sabaqtaryn qatysady.
Bıyl óńirdegi shyǵarmashylyq tapsyrysty jan basyna qarjylandyrýǵa bıýdjetten 1 mıllıard 127 mıllıon teńge bólindi.
«Meniń qyzym Emılııa eki jyl boıy La Dance complex stýdııasynyń Millennium ansamblinde bıleıdi. Birinshi jyly biz aqyly oqydyq. Sodan keıin ArtSport baǵdarlamasy týraly bilip, vaýcher aldyq. Bir jyldan beri tegin aınalysyp kelemiz, áıtpese aıyna 13 myń tóleýge týra keler edi. Meniń oıymsha, bul balalar úshin tamasha múmkindik. Óıtkeni, aqyly úıirmege balasyn jiberýge barlyq otbasynyń múmkindigi joq. Qyzyma óte unaıdy», – dep atap ótti qaraǵandylyq Naılıa Imranova.
Búgingi tańda ansamblde 3 jastan 13 jasqa deıingi 200-ge jýyq bala tárbıelenedi.
Sondaı-aq kishkentaı qaraǵandylyqtardyń arasynda kıim pishý jáne tigýdi úırengisi keletinder kóp. «Toǵjan» shyǵarmashylyq ortalyǵynda bul isti sertıfıkattalǵan sheberler oqytady. Olar balalarǵa ólshem jasaýǵa, úlgilerdi ajyrata alýǵa, eń bastysy, tigin sheberliginiń negizderin ıgerýge kómektesedi. «Kıim úlgileý, pishý jáne tigý» baǵytynda tórt topta 30-dan astam bala oqıdy.
«Bastapqyda bizde «Keskindeme jáne sýret salý» baǵyty boıynsha alty topta shamamen 60 bala oqydy. Bir ǵana oqytýshy boldy. ArtSport baǵdarlamasynyń engizilýimen bizdiń ortalyqta taǵy úsh úıirme ashyldy: dombyra, kıim úlgileý, pishý jáne tigý, grafıka. Toǵyz oqytýshy jumysqa qabyldandy. Búgingi tańda bizde bul úıirmelerge 280 adam tegin barady. Pishý jáne tigýmen aınalysatyn balalar túrli kórsetilimderge qatysady, óz qoldarymen tigilgen kıimder men sómkelerdi usynady», – deıdi ortalyq basshysy Aıgúl Medeýbaeva.
Eske salsaq, Qazaqstanda memlekettik shyǵarmashylyq tapsyrys jobasy 2021 jyldyń mamyr aıynda bastalǵan bolatyn. Onyń maqsaty – 4 pen 17 jas aralyǵyndaǵy balalardy tegin úıirmelermen qamtý. Joba artsport.edu.kz portalynda iske asyrylady.
Foto: Qaraǵandy oblysy ákimdiginiń baspasóz qyzmeti
