Qaraǵandy oblysynda aýyldardy damytý boıynsha 17 joba júzege asyrylmaq
Qaraǵandy oblysynda aýyldyq jerlerde 276 myńǵa jýyq adam turady. Olarǵa laıyqty ómir súrý deńgeıin qalaı qamtamasyz etý kerek jáne qala men aýyl arasyndaǵy alshaqtyqty qalaı azaıtýǵa bolady – bul týraly onlaın rejımde ótken apparattyq keńeste aıtyldy.
«Qaraǵandy oblysynda 419 aýyldyq eldi meken bar. 2019 jyldan bastap júzege asyrylyp kele jatqan «Aýyl – El besigi» arnaıy jobasy aýyldaǵy ómir sapasyn jaqsartý quraldarynyń biri bolyp tabylady. Eki jyl ishinde 6,6 mlrd teńgege 73 joba oryndaldy. Bul áleýmettik nysandardy, joldardy, sýmen jáne elektr qýatymen jabdyqtaý jelilerin jóndeý, aýlalardy, saıabaqtar men gúlzarlardy abattandyrý jumystary. Joba 65 myń adam turatyn 16 tirek aýyldyq eldi mekendi qamtydy. 2021 jyly toǵyz aýyldyq eldi mekende 17 jobany iske asyrý josparlanýda. Feldsherlik-akýsherlik pýnktter, dene shynyqtyrý-saýyqtyrý keshenderin, sýmen jabdyqtaý jáne sý burý jelilerin salýǵa, joldardy jóndeýge basa nazar aýdaryldy», - dedi Ekonomıka basqarmasynyń basshysy Azamat Muqanov.
Mysaly, Nura aýdanynyń Kertindi aýylynda feldsherlik-akýsherlik pýnkt paıda bolady, al Qarqaraly aýdanynyń Egindibulaq aýylynyń turǵyndary jańa dene shynyqtyrý-saýyqtyrý kesheninde buqaralyq sportpen shuǵyldana alady. Bes kent pen aýyldardaǵy joldar jóndeledi: Aǵadyr, Egindibulaq, Molodejnyı, Topar jáne Qarabasta. Aqadyr kentinde káriz jelileri men rezervtik sý qubyry salynady.
Keńeste habarlaǵandaı, 2020 jyly aýyldyq jerlerde 100 myń sharshy metr turǵyn úı salyndy.
Osy jyly elektr qýatymen jabdyqtaý senimdiligin arttyrý úshin 212 km elektr jelileri men 15 qosalqy stantsııany jóndeý jáne jańǵyrtý josparlanǵan. Jumystar Qarqaraly, Ulytaý, Aqtoǵaı, Jańaarqa, Shet aýdandarynda júrgiziletin bolady. Investıtsııalyq baǵdarlamalar aıasynda «Qaraǵandy Jaryq» JShS, «Jez.ÓEK», «KREK» JShS, QDB jáne «Qazaqmys Dıstrıbıýshn» JShS PES-i shamamen 11,2 mlrd teńge qarastyrdy.
2021 jyly sýmen jabdyqtaýdy iske asyrý boıynsha 14 jobaǵa qarajat bólindi. Buqar Jyraý aýdanynda alty aýylda: Asyl, Jańatalap, Qýshoqy, Sarytóbe, Qyzyljar, Sheshenqarada sý qubyrlary salynyp, jumys istep turǵandary qaıta jańǵyrtylady. Sýmen jabdyqtaý salasyndaǵy jobalar Abaı, Qarqaraly, Nura, Osakarov aýdandarynda da iske asyrylady. Jyl qorytyndysy boıynsha oblysta aýyl turǵyndary úshin aýyz sýmen qamtamasyz etý 90%-ǵa deıin kóterilmek.
Bıyl oblys boıynsha 190 shaqyrym aýdandyq, qalaishilik jáne kentishilik joldardy jóndeý josparlanýda. Abaı, Aqtoǵaı, Jańaarqa jáne Shet aýdandarynda 18 aýyldyń joldaryn retke keltirýge ýáde berilip otyr.
Áleýmettik qoldaýdy «Dıplommen – aýylǵa» jobasy boıynsha jumysqa kelgen jas mamandar alady. Bul tek dárigerler men muǵalimder ǵana emes, sonymen qatar AÓK qyzmetkerleri, aýyl ákimdikteriniń qyzmetkerleri. Bıylǵy jyly 233 adamǵa turǵyn úı satyp alýǵa bıýdjettik nesıeler, 402 adamǵa kóterme nesıeler kózdelgen.
Memlekettik qoldaýdyń arqasynda aýyl kásipkerligi damýda, dep atap ótildi keńeste. Kásipkerlik basqarmasynyń málimetinshe, oblysta 37 myńǵa jýyq aýyl turǵyny bıznespen aınalysady. Bıyl «Eńbek» baǵdarlamasy boıynsha aýylda 433 jobany jeńildikpen shaǵyn nesıemen qoldaýǵa qarajat bólindi. Aýyldyq jerlerde bıznes-ıdeıalardy iske asyrýǵa 533 grant berý josparlanýda.
«Qarapaıym zattar ekonomıkasy» baǵdarlamasy boıynsha maquldanǵan jobalardyń basym bóligi aýyldyq bızneske tıesili. Bıznestiń jol kartasy - 2025 boıynsha aýyldyq óńirlerde 58 joba maquldandy.
Aýyl sharýashylyǵyna salynatyn ınvestıtsııalar ósti. Ótken jyly salaǵa 25,9 mlrd teńge, al 2021 jyldyń basynan bastap 7 mlrd teńge baǵyttaldy, dep habarlady Aýyl sharýashylyǵy basqarmasynyń basshysy Asqar Sanaýbarov. Onyń aıtýynsha, aýyl sharýashylyǵynda jumyspen qamtylǵandar sany 22%-ǵa ósti. Aldaǵy bes jylda AÓK-de bes myńnan astam jańa jumys oryndaryn qurýmen 56 ınvestıtsııalyq jobany iske asyrý josparlanyp otyr. Bıyl 11 joba iske qosylady dep kútilýde.
«Bizdiń mindetimiz – tabysty arttyryp, aýyl turǵyndarynyń ál-aýqatyn kóterý. Aýyl turǵyndaryna memlekettik baǵdarlamalardyń múmkindikteri men artyqshylyqtaryn túsindirý qajet – bul jergilikti bıliktiń jumysy. Basym baǵyttar: aýyldyq jerlerdegi ınfraqurylymdy jaqsartý, joldardy jóndeý, TKSh sapaly qyzmetteri, qoljetimdi jáne sapaly medıtsına, bilim berý, turǵyn úı qurylysy, mádenıetti saqtaý jáne damytý bolyp tabylady. Bizdiń barlyq aýyldar men kentterde laıyqty ómir súrý deńgeıin qamtamasyz etý úshin barlyq sharalardy qabyldaý qajet», - dep atap ótti Jeńis Qasymbek.
