Qaraǵandy oblysynda aýyl ákimderin saılaýǵa 149 úmitker usynyldy

QARAǴANDY. QazAqparat – Qaraǵandy oblysynyń aýyldyq okrýgter, aýyldar men kentter ákimderin saılaý 2021 jylǵy 25 shildege belgilengen. Qazirgi tańda úmitkerlerdi usyný júrip jatyr, dep habarlaıdy QazAqparat tilshisi.

Óńirde alǵashqy tikeleı saılaýda 75 aýyl ákimin saılaý josparlanýda. Saılaý 134 myńnan astam adam turatyn 149 eldi mekende ótedi. Turǵyndardyń 81 myńnan astamy - saılaýshylar.

Qaraǵandy oblystyq saılaý komıssııasynyń aqparaty boıynsha, 30 maýsymǵa deıin 149 kandıdat usynyldy: saıası partııalardan – 7 jáne ózin-ózi usynýshylardan – 142.

Kandıdattardy usyný 26 maýsymda bastalyp, 9 shildede aıaqtalady.

Ákim laýazymyna saılaý úshin el azamatynyń jasy 25-ten kem emes, áreketke qabiletti, memlekettik qyzmet salasyndaǵy zańnama talaptaryna saı bolýy, zańda belgilengen tártippen tanylǵan sottylyǵy jáne sybaılas jemqorlyq qylmys, sybaılas jemqorlyq quqyq buzýshylyq jasaý faktisi bolmaýy tıis.

Úmitkerler talaptarǵa sáıkestigin tekserý rásiminen ótedi. Kandıdattardy tirkeý barlyq qajetti qujattardy alǵannan keıin bastalady jáne saılaýǵa 10 kún qalǵanda aıaqtalady. Sodan keıin saılaý aldyndaǵy úgit bastalady.

Óńirde aýyl ákimderiniń tikeleı saılaýyn ótkizýge 164 saılaý komıssııasy – 15 aýmaqtyq jáne 149 ýchaskelik komıssııa jumyldyrylady.