Qaraǵandy oblysynda alıment tólemegen 11 adam qylmystyq jaýapqa tartyldy

QARAǴANDY. QazAqparat – Qaraǵandy oblysynda balasyna alıment tólemegen 11 turǵynnyń ústinen qylmystyq is qozǵaldy. Bul týraly Ádilet departamentiniń keńeıtilgen alqa otyrysynda baıandaldy, dep habarlaıdy QazAqparat tilshisi.

Qaraǵandy oblystyq Ádilet departamenti quqyq qorǵaý organdarymen birlesip 2022 jyly atqarylǵan jumystaryn qorytyndylady. Alqa otyrysynda jeke sot oryndaýshylarynyń qyzmeti, eńbekaqyny óndirip alý jáne alıment máselesi jan-jaqty talqylandy.

«Jalpy aıtqanda jeke jáne memlekettik sot oryndaýshylarynyń óndirisinde ótken jyly 19 mlrd astam somaǵa 30 myńnan astam atqarýshylyq qujat bolǵan. Al basty nazar aýdaratyn qujattar ol eńbekaqyny óteý bolyp tabylady. Ótken jyly eńbekaqyny óteý boıynsha 144 atqarý óndirisi bolǵan. Onyń 59-y jabyldy jáne 133 mln teńgeden astam kólemde eńbekaqy óteldi», - dedi Qaraǵandy oblystyq Ádilet departamentiniń bólim bastyǵy Ádilhan Izatov.

Alıment boıynsha ótken jyly boryshkerler qaryzy 3 mlrd teńgeden 1,8 mlrd teńgege deıin tómendegen.

«Alımentterdiń sany 1200-ge deıin azaıdy. Alıment tólemegen 11 adam qylmystyq jaýapkershilikke tartyldy», - dep qosty Ádilhan Izatov.

Sondaı-aq ótken jyly 12 myńnan astam azamatqa tegin zań kómegi kórsetilgen. Aldaǵy ýaqytta mamandar bul kórsetkishti arttyrýdy josparlap otyr.