Qaraǵandy oblysynda áleýmettik bı stýdııasy ashyldy
Halyqaralyq qaıta qurý jáne damý banki men QR Bilim jáne ǵylym mınıstrliginiń birlesken aktsııasy jastarǵa áleýmettik kásipkerlik elementterin ıgerýge jáne ony odan ári damytýǵa múmkindik beredi.
«Zhas Project jobasy týraly kóptegen qazaqstandyqtar sekildi Instagram áleýmettik jelisinen bildim. Úsh jasymnan beri «Detstvo» úlgili bı ansamblinde bıledim. Ujym jetekshisi - Olga Goleva. Ol árqashan oqýshylaryn meıirimdi bolýǵa jáne óz múmkindikterine qaraı otyryp, basqalarǵa kómektesýge úıretti. Onyń kómegi men nusqaýlarynyń arqasynda biz Without borders («Shekarasyz») áleýmettik bı stýdııasyn ashtyq», - deıdi stýdııanyń negizin qalaýshy Marııa Storchak.
Bul, búgingi tańda Saran qalasynda kópbalaly jáne az qamtylǵan otbasylardan shyqqan balalar, sondaı-aq erekshe qajettiligi bar balalar shuǵyldanatyn jalǵyz bı stýdııasy.
«Iá, bul – erekshe balalar. Biraq olardyń árqaısysynda óziniń ishki álemi bar. Bul olardyń shyǵarmashylyqtan ózderin taba almaıdy degendi bildirmeıdi. Bı stýdııasy men úshin qazir kóp nárseni bildiredi. Osy balalarmen daıyndyq pen qarym-qatynas meniń sanamdy jáne álemge degen kózqarasymdy ózgertti», - deıdi Marııa.
Árıne, mundaı jobany jalǵyz ıgerý múmkin emes. Biraq Marııanyń árqashan kómektesetin jáne qoldaıtyn komandasy bar. Bul rýhy jaqyn úsh adam – Roman Sharıpov, Ilana Alpysbaeva jáne Tatıana Storchak.
«Men sýdıamyzdyń kóshbasshysy bolý baqytyna ıe boldym. Jalpy, bilimim boıynsha men pedagogpyn. «№17 mektep-gımnazııasy» KMM-de muǵalim bolyp jumys isteımin. Horeograf degen qosymsha bilimim bar. Biraq biz barlyq jumysty toppen birge jasaımyz. Sonymen qatar, Olga Goleva bizdiń jobaǵa úlken úles qosýda. Ol baǵyttaıdy, shaqyrady jáne tipti jattyǵýlarǵa qatysady», - deıdi Marııa.
Jobaǵa qatysqan barlyq ýaqyt aralyǵynda Without borders stýdııasyna Saran qalasynyń Mádenıet saraıy da úlken kómek kórsetýde. Onyń dırektory Lıýdmıla Feoklıstova Zhas Project aıasynda sabaq ótkizý úshin tegin oryn-jaı usyndy.
«Stýdııanyń negizgi mindeti - áleýmettik mártebesi men densaýlyq jaǵdaıyna qaramastan balalarǵa mýzykany, yrǵaqty sezinýge jáne qarapaıym qımyldardy meńgerýge múmkindik berý. Sebebi odan kózdiń jaýyn alatyn tamasha kompozıtsııalar qurylady. Bizge sabaqqa kelgen ár bala óziniń qabiletteri men talanttaryn ashady», - deıdi Marııa Storchak.
Without borders áleýmettik bı stýdııasynda sabaqtar tegin ótkiziledi. Zhas Project aıaqtalǵannan keıin komanda osy baǵytty odan ári damytýdy kózdep otyr. Estý qabileti buzylǵan balalarǵa qosymsha toptar ashý josparda bar.
