Qaraǵandy oblysynda 313 syrqat koronavırýstan keıin ońaltýdan ótti
Bıyl KVI aýyr túri men aýyrlyǵy ortasha dárejedegi naýqastardy ońaltýǵa medıtsınalyq saqtandyrý qory 108,7 mln teńge bólýdi josparlap otyr. Onyń 24,7 mln teńgesi oblystyń ońaltý ortalyqtaryna jiberildi.
«MÁMS engizilýimen medıtsınalyq ońaltý jańa deńgeıge shyqty. Qan aınalymy júıesi aýrýlarynan (ınfarkt, ınsýlt), kardıohırýrgııalyq, neırohırýrgııalyq jáne travmatologııalyq otalardan keıin naýqastardy ońaltýdan basqa, qazir koronavırýstyq ınfektsııadan keıin ońaltýǵa erekshe kóńil bólinýde. Oblysta COVID–19-dan keıin qalpyna keltirý kýrsynan bes medıtsınalyq uıymda ótýge bolady – bul «Tulpar» JShS, «Jezqazǵan medıtsınalyq ortalyǵy», «Shıpager» balalardy ońaltý ortalyǵy», «Jańa emhana», «Bereznıakı» sanatorııi», – dep habarlady medıtsınalyq saqtandyrý qorynyń Qaraǵandy fılıalynda.
«Tulpar» ortalyǵynda KVI-den keıin patsıentterdi ońaltý úshin jeke korpýs jumys isteıdi, onyń aýdany - 2 000 sharshy metr.
Qosymsha jabdyqtar, onyń ishinde ottegi kontsentratorlary men bıotrondar satyp alyndy.
Qalpyna keltirý kýrsy orta eseppen 10 kúnge sozylady. Bul rette ár patsıenttiń jaǵdaıyna baılanysty.
Ortalyq mamandary aldymen emdelýshiniń jaǵdaıyn, ókpeniń zaqymdaný kólemin, bar asqynýlardy, qatar júretin aýrýlardy baǵalaıdy.
Osy kórsetkishterge sáıkes naýqasqa vıbromassaj, jaryqpen emdeý taǵaıyndalady – bıoptron, elektroforez, ıngalıatsııa, fızıoterapııa jattyǵýlary.
«Sonymen qatar, bizde psıhologııalyq ońaltý júrip jatyr. Patsıentterdiń 90%-ynda kovıdten keıingi depressııa, qorqynysh, uıqysyzdyq, mazasyzdyq bar. Psıholog toptyq jáne jeke sabaqtar ótkizedi, demalýǵa arnalǵan jattyǵýlardy kórsetedi», – deıdi «Tulpar» ortalyǵynyń reabılıtology Barshyn Myrzaeva.
Vıbromassaj entigý, jótel sııaqty ótken aýrýdyń qaldyq qubylystarynan arylýǵa kómektesedi.
«Bul ókpe tinine áser etedi jáne osy belgilerdi joıady. Ony 7 kúnge taǵaıyndaımyz. Bıoptronnyń qabynýǵa qarsy, qalpyna keltiretin áseri bar. Ol 10 kúnge taǵaıyndalady», – dep túsindirdi «Tulpar» fızıomedbıkesi Saltanat Mahambetova.
Qaraǵandylyq Oksana Ysqaqova osy jyldyń mamyr aıynda koronavırýs ınfektsııasyn juqtyrǵan. Ol aýrýhanaǵa ókpeniń 30% zaqymdanýymen túskeen.
Shyǵarý kezinde bul kórsetkish 20% qurady. Qazir áıel ońaltý kýrsyn aıaqtap jatyr jáne onyń aıtýynsha, jaǵdaıy aıtarlyqtaı jaqsaryp keledi.
«Men aýrýhanadan shyqqan soń maǵan emhanadan qońyraý shalyp, ońaltý bar ekenin habarlady. Eki aptalyq karantınnen keıin men testileýden ótip, juma kúni keshke portalǵa ótinish berdim. Jeksenbide men aýrýhanaǵa jatqyzý kúni týraly habarlama aldym. Onda men entikpemen tústim. Qazir tynys alýym jeńildedi, jaǵdaıym jaqsaryp keledi», – dedi Oksana Ysqaqova.
Búgingi kúni «Tulpar» ortalyǵyndaǵy táýlik boıy statsıonardyń barlyq 55 tósegi bos emes.
Sońǵy eki aıda óńirde kovıdten keıingi ońaltýǵa suranys artty. Degenmen, qalpyna keltirý eminiń qarsy kórsetilimderi de bar.
Ońaltý protsedýralary qaterli isik, juqpaly aýrýlarmen aýyratyn naýqastarǵa, sondaı-aq aýyr tynys alý jetkiliksizdigimen jáne keıbir júrek aýrýlarymen aýyratyndarǵa ruqsat etilmeıdi.