Qaraǵandy oblysynda 300-ge jýyq aýyl mektebin jańǵyrtý josparlanǵan

QARAǴANDY. QazAqparat – Qaraǵandy oblysynda aýyl mektepterin jańǵyrtý, olardyń materıaldyq-tehnıkalyq bazasyn nyǵaıtý jáne ınfraqurylymyn jaqsartý jalǵasyp jatyr. Sondaı-aq, óńirde on bilim berý nysany salynýda, onyń ishinde aýyldyq jerlerde úsh mektep, tórt qosymsha qurylys, eki balabaqsha jáne Sátbaev qalasynda oqýshylar saraıy bar, dep habarlaıdy QazAqparat tilshisi.

Qaraǵandyda 11a shaǵyn aýdanda mektep qurylysy aıaqtalyp, MJÁ aıasynda «Taýgúl» shaǵyn aýdanynda mektep salýǵa qujattar paketi daıyndalýda.

Bul týraly Óńirlik kommýnıkatsııalar qyzmeti alańynda ótken onlaın brıfıngte bilim basqarmasynyń basshysy Gúlsim Qojahmetova aıtty.

«Aýyl mektepterin jańǵyrtý aıasynda 57 mektepke kúrdeli jáne aǵymdaǵy jóndeý jumystary júrgizildi. Jyl sońyna deıin 61 mektep kitaphanasy men 9 ashana, 26 mektep pándik kabınettermen jabdyqtalyp, 12 oqý ornynda jıhaz jańartylady. Nur Otan jol kartasy aıasynda 2025 jylǵa deıin taǵy 299 aýyl mektebin jańǵyrtý josparlanǵan», – dedi Gúlsim Qojahmetova.

Óńirdegi oqý oryndaryn úsh aýysymdyqtan aryltý úshin 2025 jylǵa deıin 17 mektep salý josparlanǵan. Onyń úsheýi - MJÁ esebinen jáne bireýi - jeke menshik.

Balalardyń qaýipsizdigi máselesine de erekshe kóńil bólinedi.

Jol kartasy aıasynda óńirde týrnıketter ornatylǵan nysandar sany 245-ke deıin, mamandandyrylǵan kúzetpen – 282-ge deıin ulǵaıtyldy.

Jaqyn arada týrnıketter taǵy 31 nysanda ornatylady, olarmen qamtamasyz etý - 87%.

Barlyq bilim uıymdarynda dabyl túımeleri, qulaqtandyrý jáne beınebaqylaý júıeleri bar.

Beınekamera sanyn arttyrý, VPN-baılanys arnasyn ornatý, JBO-ǵa nemese óńirlerdiń kezekshi bólimine beınesıgnaldy shyǵarý boıynsha jumys jalǵasýda.

«Aýtıstik spektrdegi aýrýlary bar balalardyń ata-analary tarapynan kelip túsken kóptegen ótinishterin eskere otyryp, Qaraǵandyda ortalyq ashý týraly sheshim qabyldandy. Ol úshin qalada aýdany 700 sharshy metr eki qabatty ǵımarat pen qajetti qarjy bólingen. Ortalyq kelesi jyly «Asyl Mıras» qoǵamdyq qorynyń qoldaýymen ashylady», – dep qosty spıker.

Oblysta mektepke deıingi uıymdar jelisin keńeıtý boıynsha jumys júrgizilýde. Jyl sońyna deıin mektepke deıingi tárbıemen qamtýdy 82,4%-ǵa deıin arttyrý josparlanyp otyr.

Tehnıkalyq jáne kásiptik bilim berý salasynda da oń ózgerister bar. Stýdentterge arnalǵan jataqhanalar sany artyp keledi.

Bıyl Qarqaraly aýyl sharýashylyǵy kolledjiniń oqýshylary úshin 100 oryndyq jataqhana paıdalanýǵa berildi.

Shahtınsk tehnologııalyq kolledji jataqhanaǵa óziniń oqý ǵımarattarynyń birin bóldi.

Qazir jóndeý jumystary júrip jatyr. 80 oryndyq jańa jataqhana osy jyldyń sońyna deıin paıdalanýǵa berilýi tıis.