Qaraǵandy oblysynda 200-den astam kólik qar qursaýynda qalyp qoıdy

QARAǴANDY. QazAqparat – Astana-Qaraǵandy respýblıkalyq mańyzy bar trassasynda 200-ge jýyq kólik omby qardan óte almaı, jolda qalyp qoıdy. Taǵy 30 kólik Qaraǵandydan Balqashqa barar jolda qar qursaýynda qalǵan, dep habarlaıdy QazAqparat tilshisi.

Aqtútek boran biraz kólik júrgizýshilerin áýre-sarsańǵa saldy. Kún raıynyń qolaısyzdyǵynan jolda qalyp qoıǵan kólikterge jol polıtsııasy qyzmetkerleri kómek kórsetip jatyr.

«3 qańtar kúni aýa raıynyń kúrt ózgerip, qar jaýyp, boran soǵýyna baılanysty Qaraǵandy oblysynyń aýmaǵynan ótetin barlyq respýblıkalyq mańyzy bar tasjoldar men oblys ishindegi joldar jabyldy. Osyǵan oraı, patrýldik polıtsııa jáne patrýldik polıtsııa batalonynyń qyzmetkerleri jumys ótkerýdiń kúsheıtilgen rejımine kóshirilip, tasjoldarda júrgizýshilerdiń qaýipsizdigin qamtamasyz etý maqsatynda qyzmet atqarýǵa kiristi», - dep habarlady Qaraǵandy oblysynyń PD baspasóz qyzmeti.

Qaraǵandydan Almatyǵa qaraı baǵyt alatyn tasjol kún raıynyń qolaısyzdyǵynan jabylyp, 30-ǵa jýyq kólik jolda qalyp qoıdy. Al, 200-ge jýyq kólik Astanadan Temirtaý qalasyna jete almaı, qar qursaýynda qalǵan. Qazirgi ýaqytta patrýldik polıtsııa qyzmetkerleri jolda qalǵan kólikterdi Temirtaý qalasyna deıin, al Temirtaýda qalǵan kólikterdi Qaraǵandyǵa jetkizýmen aınalysyp jatyr.

Tótenshe jaǵdaılardyń aldyn alý jáne júrgizýshiler men jolaýshylardyń qaýipsizdigin saqtaý maqsatynda Qaraǵandy oblysynyń polıtsııa departamenti avtokólik júrgizýshilerine alys saparlardan bas tartýǵa jáne eldi mekennen tys jerlerge shyqpaýǵa keńes beredi.

Foto vıdeodan alyndy