Qaraǵandy qalasyn eki kúnnen beri tútin tumshalap tur

QARAǴANDY. QazAqparat – Eki kúnnen beri Qaraǵandy qalasyn qoıý tútin basyp tur. Turǵyndar «aýada ys bar, demalý qıyn» dep shaǵymdanýda, dep habarlaıdy QazAqparat tilshisi.

Qaraǵandy qalasyn basqan qoıý tuman ekinshi kún boldy seıiler emes. Kúrdeli meteorologııalyq jaǵdaıdy ekologter kún tymyq turýymen baılanystyrady. Onyń ústine sońǵy kúnderi óńirde aıaz kúsheıip, jeke sektordaǵy úıler pesh jaǵýyn jıiletken. Túni boıy kólikterin qyzdyratyn turǵyndar da kóbeıgen. Nátıjesinde qala ortalyǵyn tútin alyp ketti.

Qazir tabıǵat janashyrlary qorshaǵan ortaǵa taralyp jatqan tútinniń quramyn anyqtap jatyr.

«Biz negizinen aýaǵa taralatyn shań-tozań men kúıeniń mólsherin anyqtaımyz. Qazir mamandarymyz qalanyń 6 núktesinde aýa synamasyn alyp jatyr. Nátıjesin qosymsha habarlaımyz», - dep túsindirdi Qaraǵandy oblysynyń Ekologııa departamenti basshysynyń orynbasary Darhan Esjanov.