Qaraǵandy ákiminiń burynǵy orynbasary Jaqsylyq Shalabekovtyń isi qaıtadan sotta qaraldy
Bul qylmystyq is 2020 jyldyń qyrkúıeginde qozǵalǵan bolatyn. Qaraǵandy ákiminiń burynǵy orynbasary men kásipkerge eki kópqabatty úı salýǵa arnalǵan 120 mln teńge kóleminde bıýdjet qarajatyn jymqyrdy, degen aıyp taǵylǵan edi.
Esterińizge sala keteıik, Qaraǵandy qalasy Qazybek bı aýdandyq sotynyń 2021 jylǵy 8 maýsymdaǵy úkimimen Shalabekov laýazymdyq ókilettikterin asyra paıdalanǵany úshin kináli dep tanylyp, QR QK-niń 361-baby 1-bóligi boıynsha bir jarym jylǵa bas bostandyǵynan aıyrylǵan bolatyn. Ol jazasyn qaýipsizdigi eń tómengi qylmystyq-atqarý júıesi mekemesinde óteıtin jáne oǵan memlekettik qyzmette qyzmet atqarýǵa ómir boıyna tyıym salynǵan edi.
Al qurylys kompanııasynyń dırektory Qasenovty sot 5 jylǵa shartty túrde bas bostandyǵynan aıyrdy.
Alaıda, Bas prokýror qylmystyq jáne qylmystyq is júrgizý zańdarynyń durys qoldanylmaýyna baılanysty osy is boıynsha narazylyq bildirdi. Onyń pikirinshe, sottalǵandardyń is-áreketteri durys saralanbaǵan. Osy sebepti ol isti jańa apellıatsııalyq qaraýǵa jibere otyryp, buryn shyǵarylǵan barlyq sot aktileriniń kúshin joıýdy surady.
Nátıjesinde Joǵarǵy sot alqasy Qaraǵandy qalasy Qazybek bı aýdandyq sotynyń 2021 jylǵy 8 maýsymdaǵy úkiminiń jáne Qaraǵandy oblystyq sotynyń qylmystyq ister jónindegi apellıatsııalyq sot alqasynyń 2021 jylǵy 2 qyrkúıektegi qaýlysynyń kúshin joıyp, qylmystyq isti sottyń ózge quramyndaǵy apellıatsııalyq satydaǵy sotqa, ıaǵnı jańa sot qaraýyna jiberýge qaýly etti.
Búgin Qazbek bı aýdandyq soty qylmystyq isti 189-bap, 4-tarmaǵyna, ıaǵnı olarǵa senip tapsyrylǵan bóten múlikti asa iri mólsherde ysyrap etý faktisi boıynsha qarady. Biraq sottalýshylar ózderi keltirgen materıaldyq zalaldy tolyǵymen ótegendikten, Shalabekov laýazymdyq ókilettikterin asyra paıdalanǵany úshin, al Qasenov alaıaqtyq jasaǵany úshin kináli dep tanyldy.
«Qylmystyq qýdalaý organy Sh. jáne K-ǵa sondaı-aq basqa adamdarǵa aldyn ala sóz baılasty degen aıyp taqty. Alaıda, bul biliktilik belgisi óziniń rastalmady, sebebi ol boljamdarǵa negizdelgen. Aıyptaýdyń negizgi dálelderi, jasyryn tergeý áreketteri jáne sotqa deıingi tergeý kezinde óreskel protsestik buzýshylyqtarǵa baılanysty birqatar saraptamalardy sot jaramsyz dep tanydy.
Sot úkimimen sottalýshylardyń áreketi qaıta saralandy:
Sh. QK 361-baby 4-bóligi 3-tarmaǵy boıynsha, sybaılas jemqorlyq qylmys jasaýda, ıaǵnı aýyr zardaptarǵa ákep soqqan laýazymdyq ókilettikterdi teris paıdalanýda kináli dep tanyldy.
Q. memlekettik qyzmetke qatysy joq adam retinde QK 190-baby 4-bóligi boıynsha alaıaqtyq jasaýda, atap aıtqanda, asa iri mólsherde aqsha urlaǵany úshin kináli dep tanyldy.
Sh-nyń memlekettik qyzmetke qyzmet etýine tyıym salynyp, 2 jyl merzimge bas bostandyǵynan aıyrý jazasy taǵaıyndaldy.
Q-ǵa keltirilgen materıaldyq zalaldyń tolyq ótelýin eskere otyryp 5 jylǵa shartty túrde bas bostandyǵynan aıyrý jazasy taǵaıyndaldy», - dep habarlady Qaraǵandy oblystyq sotynyń baspasóz qyzmeti
