Qaraǵandynyń jas kásipkerleri qala ákiminiń grantyna ıe boldy

QARAǴANDY. KAZINFORM – Qaraǵandy qalasy ákiminiń 1,5 mln teńge grantyn 10 jas kásipker aldy. Іsin jańadan bastaǵan jáne jumys istep júrgen kásipkerler bul qarajatqa baıqaý komıssııasynyń irikteýinen ótken jobalardy júzege asyrýǵa jumsaıdy.

Saltanatty tabystaý Qaraǵandy qalasynyń Ortalyq mádenıet jáne demalys saıabaǵynda ótti. Grant ıegerlerin Qaraǵandy qalasy ákiminiń orynbasary, baıqaý komıssııasynyń tóraǵasy Dastan Qudabaev jáne Qaraǵandy qalasy jastar resýrstyq ortalyǵynyń basshysy ıAkýb Djamalov quttyqtady. Al sertıfıkattardy Qaraǵandy qalalyq máslıhatynyń tóraǵasy Altyntóre Bókenov tabystady. 

Baıqaýǵa óz jobalaryn 118 úmitker usyndy. Onyń ishinde baıqaý komıssııasy qala turǵyndary úshin eń kreatıvti jáne paıdaly 10 adamdy tańdaýy tıis boldy. 

Baıqaý komıssııasynyń quramyna memlekettik organdardyń ókilderi, depýtattar, bıznes qurylymdarynyń ókilderi jáne qoǵam qaıratkerleri kirdi. 

Barlyq qatysýshy jas kásipkerler ekonomıka, qarjy, quqyq jáne bıznesti masshtabtaý salalarynda aldyn ala akseleratsııadan ótti, sonymen qatar kópshilik aldynda sóz sóıleý, elevator pitch, bıznes jobalardy tıimdi qorǵaý, qyzyqtyratyn suraqtarǵa jaýap alý taqyryptary boıynsha oflaın oqytyldy.

Jeńimpaz jobalardyń qatarynda 3D-basyp shyǵarý arqyly erekshe qajettilikteri bar adamdarǵa protez jasaý, STEAM zamanaýı jáne ınnovatsııalyq ádistemesi bar IT-mektep, gıps buıymdaryn shyǵaratyn óndiris, erekshe balalarǵa arnalǵan Sezin ınklıýzıvti shyǵarmashylyq ortalyǵyn ashý, Blackjump fıtnes-stýdııa fılıalynyń ashylýy jáne t.b. bar. 

Qaraǵandy qalasy ákiminiń 2024 jylǵy grant ıegerleri Aleksandr Ermolenko, Ǵabyláli Baltabaev, Sholpan Ejebaeva, Anton Sýbbotın, Fatıma Abylaeva, Súıindik Qaqabaev, Jazıra Tólegenova, Móldir Nurǵazy, Qaraqat Amankeldıeva jáne Dıana Araı atandy. 

Qaraǵandy qalasy ákiminiń granty – jastar kásipkerligin qoldaýǵa jáne damytýǵa baǵyttalǵan joba. Ol úshinshi jyl qatarynan iske asyrylýda.