Qaraǵandylyq jas daryn dron-reısıngtiń álemdik reıtıngin baǵyndyryp júr
QARAǴANDY. KAZINFORM — Qaraǵandynyń 12 jastaǵy sportshysy Tımofeı Mýravev Qazaqstan tarıhynda alǵash ret FPV-dronmen Eýropadaǵy FAI Dúnıejúzilik kýbogynyń jarys jolyna shyqty.
Bolgarııanyń Varna qalasynda ótken aıtýly dodada álemniń eń myqty pılottary bas qosty. Qarsylastardyń tájirıbesi men sheberligine qaramastan, jas qazaqstandyq márege jetinshi bolyp kelip, planetanyń úzdik on pılotynyń qataryna endi.
Dronǵa degen qyzyǵýshylyq Tımofeıdiń boıyna bala kúninen sińdi. Oǵan alǵashqy áýejaı tájirıbesin syılaǵan da, tehnıka tilin úıretken de ákesi. Búginde onyń sporttyq jetistikteri tańdaı qaqtyrarlyq: úsh márte Qazaqstan chempıony atanyp, birneshe iri halyqaralyq jarysta el namysyn qorǵaǵan.
FAI Dúnıejúzilik kýbogynda Bolgarııa, Túrkııa, Frantsııa, Serbııa jáne Qytaıdan kelgen, talaı márte chempıon atanǵan saıdyń tasyndaı sańlaqtar baq synady. Osyndaı azýly qarsylastar arasynda úzdikter qatarynan kóriný — naǵyz erlik. Alaıda júldeli orynǵa qol jetkizýge jartylaı fınalda bolǵan kútpegen oqıǵa bóget boldy. Áýede soqtyǵysyp qalǵan dronnyń propelleri zaqymdanyp, jarysty erte aıaqtaýǵa týra keldi.
— Bizdiń qarsylastarymyzdyń kóbi jasy 18 ben 25 arasyndaǵy tájirıbeli, talaı doda kórgen myqtylar. Olarǵa qarsy turý ońaı emes. Degenmen, biz úzdiksiz jattyǵyp, alǵa jyljyp kelemiz. Tımofeı qazirdiń ózinde álemdik deńgeıdegi kóshbasshylardyń ókshesin basyp júr, — deıdi ákesi ári jattyqtyrýshysy Sergeı Mýravev.
Bul jarystyń taǵy bir ereksheligi ár pılot tek drondy sheber basqarýmen shektelmeı, ony ushyrýǵa ózi daıyndaýy tıis.
— Munda tehnıkany durys jınaý, vıntomotor tobyn dál baptaý, baǵdarlamalyq júıeni minsiz úılestirý — bári jarystyń bir bóligi. Ushqyshtyń jeńisi osy daıyndyqqa tikeleı baılanysty, — dep túsindirdi Sergeı Mýravev.
Dúnıejúzilik kýboktan keıin Tımofeı Bolgarııa astanasy Sofııada ótken MultiGP jazǵy irikteýinde de kózge túsip, tórtinshi oryndy ıelendi. Bul jarystaǵy jáne buǵan deıin Almatyda ótken kóktemgi irikteýdegi upaılary qosylyp esepteledi. Eger qos kezeń qorytyndysynda ol álemdik reıtıngtiń úzdik 150 qataryna ense, bıyl kúzde AQSh-tyń Maıamı qalasynda ótetin dron-reısıngten álem chempıonatyna joldama alady.
Osyǵan deıin Oblystyq jáne respýblıkalyq mańyzy bar qalalardyń aýmaǵyndaǵy memlekettik kúzet baqylaýyna berilgen mekemelerdiń ústinen dron ushyrýǵa shekteý engizýdiń erejesi ázirlenip jatqany jaıla habarlaǵan bolatynbyz.