Qaraǵandylyq zeınetkerden 20 keli marıhýana men gashısh tárkilendi
QARAǴANDY. KAZINFORM — Qaraǵandy oblysynda esirtki qylmysyna qarsy is-qımyl basqarmasynyń qyzmetkerleri iri esirtki tasymaldaý arnasyn áshkerelep, 75 jastaǵy qala turǵynyn ustady.
Jedel is-sharalar keń aýqymdy «Qarasora» is-sharasy aıasynda júrgizildi.
Aldyn ala alynǵan málimet boıynsha kúdiktiniń tyıym salynǵan zattardy alyp ótýi múmkin ekeni anyqtalǵan. Temirjol vokzalynda júrgizilgen tintý kezinde onyń qol júginen ósimdik tektes esirtki zattary — shamamen 20 keli marıhýana men gashısh tárkilendi. Odan bólek, vokzal mańynda turǵan kúdiktiniń avtokóligin tekserý barysynda bagajdan oraýysh taspamen qaptalǵan eki iri brıket tabyldy. Saraptama qorytyndysyna sáıkes, olardyń ishinde de marıhýana bolǵan. Jalpy tárkilengen esirtki zattarynyń salmaǵy shamamen 20 keli.
Atalǵan derek boıynsha asa iri kólemdegi esirtki zattarynyń zańsyz aınalymyna qatysty Qylmystyq kodekstiń tıisti baby boıynsha is qozǵaldy. Qazirgi ýaqytta tergeý amaldary júrgizilip, oqıǵanyń barlyq mán-jaıy anyqtalyp jatyr. Sondaı-aq polıtsııa ózge tulǵalardyń qylmystyq áreketke qatysy bar-joǵyn tekserip jatyr. Quqyq qorǵaý organdary esirtki zattarynyń Qaraǵandy aýmaǵynda taratylýy nemese basqa óńirlerge jetkizilýin anyqtap jatyr.
Aıta ketelik ShQO-da esirtki graffıtıleri boıynsha 8 qylmystyq is qozǵalǵan edi.