Qaraǵandydaǵy polıtsııa pýnktinen áıeldiń máıiti tabyldy

QARAǴANDY. KAZINFORM — Qaraǵandyda polıtsııanyń bir tirek pýnktinde áıel adamnyń máıiti anyqtaldy. Oqıǵa ornynda es-tússiz jatqan polıtseı qyzmetkeri de bolǵan. Ol dereý medıtsınalyq mekemege jetkizildi. 

Qaraǵandy oblysy polıtsııa departamentiniń baspasóz qyzmeti málimdegendeı, oqıǵaǵa baılanysty qylmystyq is qozǵaldy.

— Qazirgi ýaqytta jaǵdaıdyń mán-jaıy men áıeldiń ólim sebebi anyqtalyp jatyr. Obektıvti tekserý úshin arnaıy jedel-tergeý toby quryldy, sondaı-aq qyzmettik tergeý taǵaıyndaldy, — delingen vedomstvo habarlamasynda.

Oblystyq polıtsııa basshylyǵy istiń tergelýi departament bastyǵynyń jeke baqylaýynda ekenin atap ótti.

— Barlyq is-áreket muqııat tekserilip, kináli tulǵalar qatań jaýapkershilikke tartylady, — dedi Qaraǵandy oblysy Polıtsııa departamentiniń bastyǵy Neǵmet Ismaǵulov.

Sonymen birge departament ókilderi azamattardy rastalmaǵan aqparat taratpaýǵa shaqyryp, mundaı áreketter tergeý barysyna kedergi keltiretinin eskertti.

Osyǵan deıin áleýmettik jelide polıtsııa qyzmetkerleriniń eki adamdy tutqyndap, qaltasyna bir zat salyp jatqan beınejazbasy tarady. Jeli qoldanýshylary ol zat esirtki degen aqparatty Polıtsııa departamenti shyndyqqa janaspaıdy dep habarlady.