Qaraǵandyda jeńil kólik qaǵyp ketken boıjetken kóz jumdy
QARAǴANDY. KAZINFORM — Qaraǵandyda 23 mamyr kúni Ýnıversıtet kóshesinde adam ólimine ákelgen jol-kólik oqıǵasy boldy. Kólik qaǵyp ketken 20 jastaǵy boıjetken oqıǵa ornynda qaza tapty. Atalǵan fakti boıynsha tergeý bastaldy.
23 mamyr kúni Qaraǵandyda jaıaý júrginshiniń qatysýymen adam ólimine ákelgen jol apaty tirkeldi. Qaraǵandy oblysy Polıtsııa departamentiniń baspasóz qyzmetiniń málimetinshe, jol-kólik oqıǵasy Ýnıversıtet kóshesinde bolǵan.
Aldyn ala málimet boıynsha, Ýnıversıtet kóshesimen kele jatqan Lada avtokóliginiń 33 jastaǵy júrgizýshisi joldyń belgilenbegen jerinen ótip bara jatqan 20 jastaǵy qyzdy qaǵyp ketken.
Alǵan aýyr jaraqattarynyń saldarynan boıjetken jedel járdem qyzmeti kelgenge deıin oqıǵa ornynda kóz jumǵan.
Jol-kólik oqıǵasy faktisi boıynsha qylmystyq is qozǵaldy. Qazirgi ýaqytta polıtseıler bolǵan jaǵdaıdyń barlyq mán-jaıyn anyqtaýǵa baǵyttalǵan qajetti tergeý áreketterin júrgizip jatyr.
— Qaraǵandy oblysynyń Polıtsııa departamenti júrgizýshiler men jaıaý júrginshilerdi jol qozǵalysy erejelerin qatań saqtaýǵa, jolda barynsha muqııat ári jaýapty bolýǵa shaqyrady, — dep habarlady Qaraǵandy oblysy PD baspasóz qyzmeti.
Eske salaıyq, buǵan deıin Ál-Farabı kóshesindegi jol apatyna qatysty is boıynsha alǵashqy sot otyrysynyń kúni belgili bolǵan edi.
