Qaraǵandyda sý jáne káriz qubyrlaryn jańartýǵa 6 mlrd teńge jumsalmaq

QARAǴANDY. KAZINFORM – Qaraǵandyda 30 shaqyrymnan astam sý qubyry jelisi aýystyrylady. Sondaı-aq 18,5 km káriz jelisi jańartylady. Bul jumystar tarıfterdi kóterý esebinen júrgiziledi, dep habarlaıdy Kazinform agenttiginiń tilshisi. 

– 1 aqpannan bastap Qaraǵandyda sýmen jabdyqtaý qyzmetteri tarıfi 20%-ǵa, sý burý qyzmetterine 10%-ǵa ulǵaıtyldy. Bul aıtarlyqtaı tozǵan magıstraldardy aýystyrý úshin jasalyp otyrǵan qadam, - deıdi «Qaraǵandy Sý» JShS. 

Qaraǵandyda ótken jyly 20 km sý qubyry jelisi men osynsha káriz jelisi aýystyryldy. Bul apattar sanyn azaıtýǵa múmkindik berdi. Bıyl ınvestıtsııalyq baǵdarlama boıynsha qaıta jańartý jumystary jalǵasady. Maqsaty – kommýnıkatsııalardyń tozýyn azaıtý jáne qyzmetterdiń senimdiligi men sapasyn qamtamasyz etý.

Qaraǵandy oblysynyń ákimi Ermaǵanbet Bólekpaevtyń tapsyrmasy boıynsha monopolıster «Investıtsııa ornyna tarıf» baǵdarlamasyn júzege asyrý boıynsha esep beredi. Jańa tarıfter men ınvestıtsııalyq baǵdarlama týraly «Qaraǵandy Sý» kompanııasynda aıtyldy.

Sý qubyry jelileriniń uzyndyǵy - 1 200 km, al olardyń tozýy - 59%. Qala boıynsha 20 jyl buryn tóselgen 400 shaqyrymǵa jýyq qubyr bar. 40-50 jyl buryn salynǵan jeliler de bar.
Káriz júıesinde de ózekti problema bar. Jelilerdiń tozýy - 82%. 737 km qubyrlardyń 500 km-den astamy 30-50 jyl buryp, keıbiri tipti odan da erte salynǵan. 

Kásiporynda 1 700-ge jýyq adam eńbek etedi.

1 aqpannan bastap sýmen jabdyqtaý jáne sý burý qyzmetterine jańa tarıfter kúshine endi. Ózgerister Tabıǵı monopolııalardy retteý komıteti departamentiniń buıryqtarymen bekitildi.
«Qaraǵandy Sý» JShS bas dırektory Erbol Tóleýov tarıfterdiń kóterilýine áser etken úsh faktordy atady. Bul 2025 jylǵa arnalǵan qarajattyń ulǵaıýymen, qyzmetkerler jalaqysynyń ósýimen, strategııalyq taýarlardyń: sý jáne elektr energııasynyń qymbattaýymen «Investıtsııalar ornyna tarıf» baǵdarlamasyn iske asyrýdyń jalǵasy.

– Bıyl bekitilgen ınvestıtsııalyq baǵdarlama boıynsha 40 sý qubyry jelisin qaıta qurý josparlanǵan. Qosymsha ınvestıtsııalyq baǵdarlama bar - taǵy bes nysan. Sáıkesinshe, 45 kóshede jalpy uzyndyǵy 30 km bolatyn sý qubyry jelilerin aýystyramyz. Sondaı-aq 18,5 km káriz jelisin aýystyrý josparlanyp otyr. Investıtsııalardyń jalpy somasy 6,1 mlrd teńgeni quraıdy, - dep habarlady Erbol Tóleýov. 

Onyń aıtýynsha, kompanııa 20-dan astam jańa tehnıka satyp alǵan, bul apatty tez arada joıýǵa múmkindik beredi.

Osyǵan deıin Jetisý oblysynda sýmen jabdyqtaý qyzmetterine tarıfter tómendetilgeni týraly habarlaǵan bolatynbyz.