Qaraǵandyda sırek metaldar bar ken orny tabyldy
ASTANA. KAZINFORM — Qaraǵandy geologtary sırek jer elementteri bar ken ornyn ashty, dep habarlaıdy Ónerkásip jáne qurylys mınıstrligi.
«Tsentrgeolsemka» JShS jer qoınaýyn geologııalyq barlaýdyń 2022-2024 jyldarǵa arnalǵan memlekettik baǵdarlamasy aıasynda Quıryqtykól ýchaskesinde barlaý jumystary kezinde shamamen mıllıon tonnany quraıtyn sırek jer metaldarynyń úlken resýrstary bar birneshe perspektıvaly aımaqty anyqtady.
— Quıryqtykól ýchaskesi Astanadan ońtústik-shyǵysqa qaraı 300 km jerde Qaraǵandy oblysy Qarqaraly aýdanynda, Qarqaralydan soltústik-shyǵysqa qaraı 100 km jerde ornalasqan. Geologııalyq turǵydan Quıryqtykól ýchaskesiniń kendi jynystary keıinirek magmalyq protsesterdiń áserinen ózgergen sóngen janartaýlar men olardyń áreket ónimderinen turatyn ejelgi janartaýlyq qurylymdy bildiredi. Ken jaıylý shkalasy boıynsha eń perspektıvaly aýdandar Yrǵyz jáne Dos 2, munda sırek jer elementteriniń jalpy mólsheri 0,1%-dan asady, jekelegen úlgilerde 0,25%-ǵa jáne odan da joǵary dárejege jetedi. Kern synamalaryn alý jáne sırek jer elementterin sandyq anyqtaý nátıjeleri boıynsha júrgizilgen Yrǵyz aýdanyndaǵy bólingen bloktyń qorlarynyń aldyn ala esebi ortasha mólsheri 0,1%-dan astam 800 myń tonnaǵa jýyq metaldardyń baryn kórsetti. Onyń ústine uńǵylar kennen shyqpaǵan, — delingen mınıstrlik habarlamasynda.
Jobadaǵy sırek jer elementteriniń analıtıkalyq zertteýleriniń kólemi shekteýli bolǵandyqtan, bul nysannyń mańyzdylyǵyn boljaǵan «Tsentrgeolsemka» JShS basshylyǵy sırek jer elementterin sandyq anyqtaýdyń edáýir bóligin óz qarajaty esebinen júrgizýge sheshim qabyldady, bul qorlardy aldyn ala baǵalaýǵa múmkindik berdi.
Aýdan boıynsha barlyq qolda bar tarıhı materıaldar men geologııalyq barlaý jumystarynyń málimetterin taldaǵannan keıin Jańa Qazaqstan atty óte úlken boljamdy aýdany qosymsha anyqtalyp, aldyn ala baǵalandy. Ol el damýynyń jańa kezeńi qurmetine atalǵan jáne ońtústik pen batysta anyqtalǵan kendi qabattardyń jalǵasy. Jańa Qazaqstan aýdany Quıryqtykól ýchaskesin túgeldeı derlik qamtıdy jáne barlyq geologııalyq alǵysharttar turǵysynan óte perspektıvaly bolyp tabylady.
— Jańa Qazaqstan aýdanynyń 300 metr tereńdiktegi sırek jer metaldarynyń jalpy boljamdy qory 20,0 mln tonnadan asady, sırek jer elementteriniń ortasha mólsheri shamamen 700 g/t quraıdy. Qazaqstanda sırek jerdi ken jaıylýdyń mundaı túriniń analogtary joq, bul ony jańa ónerkásiptik tıpke jatqyzýǵa múmkindik beredi. Anyqtalǵan sırek jer ken oryndary men perspektıvalyq ýchaskeler, eger odan ári rastalsa, bolashaqta Qazaqstandy sırek jer elementteriniń qory boıynsha álemde jetekshi orynǵa shyǵarýy múmkin, bul sırek jer metaldarynyń joǵary tehnologııalyq salasyn qarqyndy damytýǵa múmkindik beredi, — dep atap ótti vedomstvo.
Ónerkásip mınıstrligi atap ótkendeı, kendi baıytý tehnologııasyn jáne baǵaly komponentterdi óndirýdi tabysty damytý óńirdiń ınvestıtsııalyq tartymdylyǵy men ekonomıkalyq damýyna áser etedi.
Buǵan deıin Oljas Bektenov geologııalyq barlaý men jer qoınaýyn paıdalanýdy damytý jóninde keńes ótkizgenin jazǵan edik.