Qaraǵandyda robot-hırýrgtiń kómegimen mıǵa ota jasalady

ASTANA. KAZINFORM – Professor H.J.Maqajanov atyndaǵy Qaraǵandy kópsalaly aýrýhanasynda Qazaqstandaǵy alǵashqy neırohırýrgııalyq keshenniń jańa býyny –  Remebot RM-200 roboty paıda boldy. Jasandy ıntellekt qurylǵysy dárigerlerge mıǵa operatsııany mıllımetrden az dáldikpen oryndaýǵa kómektesedi, dep habarlaıdy Kazinform agenttiginiń tilshisi.

Remebot RM-200 – medıtsınalyq derekterdi taldaýǵa jáne operatsııa kezinde hırýrgtarǵa kómektesýge qabiletti ıntellektýaldy júıe. Jaqyn arada onyń kómegimen ota jasalady: ıntrakranıaldy bıopsııa jáne mı isikteriniń ablıatsııasy.

Aýrýhana dırektory Erkin-Dáýir Qurmanǵalıevtiń aıtýynsha, bul tehnologııany engizý jyl saıyn 300-den astam joǵary tehnologııalyq neırohırýrgııalyq operatsııalardy jasaýǵa, protsedýralardyń ınvazıvtiligin jáne patsıenttiń saýyǵý ýaqytyn qysqartýǵa múmkindik beredi.

– Berilgen núktege jetýdiń dáldigi mıllımetrden az. Bul Parkınson aýrýy, epılepsııa, mı isigi bar naýqastarǵa operatsııa jasaýǵa, sondaı-aq stereotaksıkalyq aralasý men gematomalardy joıýdy sátti oryndaýǵa múmkindik beredi, - dep túsindirdi Erkin-Dáýir Qurmanǵalıev.

Qaraǵandylyq neırohırýrgter osyǵan uqsas ádister keńinen qoldanylatyn Qytaıda taǵylymdamadan ótti. Onda mamandar júıeni paıdalanýdyń praktıkalyq daǵdylaryn damyta otyryp, birqatar synaq operatsııasyn jasady.

Reme-Hybrid gıbrıdti tehnologııasy bar robottyq qol naqty dáldikti jáne tinderge mınımaldy áser etýdi qamtamasyz etedi. Bul Qaraǵandyda bas mıynyń aýyr patologııasy bar naýqastardy qutqarý úshin jańa múmkindikter ashady.

Aıta keteıik, Almaty qalalyq kardıologııalyq ortalyǵynda alǵash ret júrektiń mıtral jáne trıkýspıdaldy qaqpaqshalaryna plastıka jasaý arqyly sátti ota júrgizildi.

Patsıentke sırek tyǵyzdalmaǵan mıokard jáne mıtral men trıkýspıdaldy qaqpaqshalardyń aıqyn jetkiliksizdigi dıagnozy qoıylǵan.

Ota júrek soǵyp turǵan kúıinde (Beating heart) jasaldy. Bul qazaqstandyq kardıohırýrgııa tájirıbesinde óte sırek kezdesetin jaǵdaı.