Qaraǵandyda órt kezinde 15 adam evakýatsııalandy

ASTANA. KAZINFORM – Qaraǵandy qalasynyń Álıhan Bókeıhan atyndaǵy aýdanyndaǵy Vostok yqsham aýdanynda bes qabatty turǵyn úıdiń birinshi qabatyndaǵy páterden órt shyqty, dep habarlaıdy Tótenshe jaǵdaılar mınıstrligi.

Oqıǵa ornyna jedel jetken qutqarýshylar páter ishindegi jıhaz janǵanyn anyqtady. Tútin basqan úıden 15 adam, onyń ishinde 8 bala baspaldaq arqyly evakýatsııalandy.

Qosymsha eki turǵyn arnaıy qutqarý qalpaqtarynyń kómegimen shyǵaryldy.

- Órt sóndirýshilerdiń jedel áreketiniń arqasynda tilsiz jaý shaǵyn aýmaqta oqshaýlanyp, tolyq sóndirildi. Qaza bolǵandar men zardap shekkender joq, - dep jazdy vedomstvodan.

Órt shyqqan páterdiń ıesi qutqarýshylarǵa kásibıligi men jedel is-qımyly úshin alǵys aıtty.

TJM órt qaýipsizdigi erejelerin qatań saqtaýǵa shaqyrady.

Aıta keteıik, Sherzat ákesiniń úıi órtenýine baılanysty tergeý toqtady.