Qaraǵandyda mert bolǵan 46 shahterdiń týystaryna qandaı tólemder berildi

Kostenko shahtasynda qaza tapqan 46 shahterdiń otbasy Biryńǵaı jınaqtaýshy zeınetaqy qorynan jerleý rásimderine birjolǵy tólem aldy.

Bul týraly Qaraǵandy oblysynyń ákimi Ermaǵanbet Bólekpaev Ortalyq kommýnıkatsııalar qyzmetinde aıtty, dep habarlaıdy Kazinform agenttigi.

Oblys ákiminiń aıtýynsha, memleket tarapynan barlyq qajetti materıaldyq qoldaý kórsetilip jatyr.

«Barlyq 46 otbasy BJZQ-dan jerleý jumystaryna birjolǵy tólem aldy. Kámeletke tolmaǵan balalary bar jáne 23 jasqa deıingi joǵary oqý oryndarynda oqıtyn balalary bar 20 otbasyna asyraýshysynan aıyrylý jaǵdaıy boıynsha memlekettik áleýmettik járdemaqy taǵaıyndaldy. Qaza tapqan kenshilerdiń otbasylaryna basqa da qoldaýlar kórsetiledi», - dedi Ermaǵanbet Bólekpaev.

Ákim «ArselorMıttal Temirtaý» kompanııasy tarapynan 44 otbasyna 10 jyldyq jalaqy tólengenin (eki otbasynyń shotyna áli túsken joq) habarlady. Qaza tapqan kenshilerdiń, olardyń jubaılarynyń, ata-analarynyń, balalarynyń nesıeleri óteldi.

Sondaı-aq, kompanııa ár otbasy múshesine keminde 18 sharshy metr alań bolatyn páter satyp alady, ázirge 7 ótinim qabyldandy. Sondaı-aq 18 jasqa deıingi (oqý kezinde 23 jasqa deıin) balalarǵa saqtandyrý tólemderi bolady .

E. Bólekpaev zardap shekkenderdiń tórt shahter medıtsınalyq mekemelerde jatqanyn, olardyń jaǵdaıy ortasha jáne jeńil dárejede ekenin jáne qajetti medıtsınalyq kómek alyp jatqanyn aıtty.

Aıta keteıik, «Atameken» ulttyq kásipkerler palatasynyń tóralqa tóraǵasy Raıymbek Batalov «ArselorMıttal Temirtaý» kompanııasynyń ornyna ınvestor bolýǵa nıetti kompanııalar álemniń qaı elderinen habarlasyp jatqanyn aıtty.