Qaraǵandyda aýyl turǵyndary ekologııalyq qaýipke tosqaýyl qoıdy
QARAǴANDY. KAZINFORM – Qaraǵandy oblysyndaǵy Qaraǵaıly kentiniń turǵyndary ekologııalyq qaýipke tosqaýyl qoıdy. Sot sheshimimen Qarqaraly aýdanynyń ákimdigi men aýdandyq qurylys bólimi káriz sýyn aǵyzý jobasyn qaıta qaraýǵa mindetteldi.
Aýyzsý janynda – káriz sýy
Káriz júıesi men sý qubyryn tartý – Qaraǵaıly jurty úshin ondaǵan jyldan beri kútken jańalyq edi. Alaıda qurylys bastalǵan sátten-aq alańdaýshylyq týyndady. Jobada tazartylǵan káriz sýlaryn Taldy ózenine aǵyzý qarastyrylǵan. Al bul ózen aýyl turǵyndaryn aýyzsýmen qamtamasyz etip otyrǵan jerasty uńǵymalarynyń dál janynan aǵady.
– Jobada tótenshe jaǵdaılar kezindegi qaýip múldem eskerilmegen. Qysta bizde boran jıi bolady, bul elektr jelileriniń úzilýine alyp kelýi múmkin. Ondaı jaǵdaıda káriz júıesi isten shyǵyp, tazartylmaǵan sý ózenge aǵyp ketýi ǵajap emes. Bul – tikeleı ekologııalyq apat, - deıdi aýyl turǵyny Umsynaı Tynybekova.
Advokat Albına Ovcharenko da jobanyń shıkiligin atap ótti. Onyń aıtýynsha, tazartýdan keıin de bul sý úshinshi sanatqa jatady, ıaǵnı turmystyq qajettilikke de, aýyl sharýashylyǵyna da jaramsyz.
– Bul sýdy malǵa berýge, egin sýarýǵa, balyq aýlaýǵa bolmaıdy. Onyń ústine, dál sol mańda taza aýyzsý bulaqtary men uńǵymalar ornalasqan. ıAǵnı qaýip tek ekologııaǵa emes, adamnyń densaýlyǵyna da tónedi, - dep málimdedi ol.
Ákimdik qarjylyq shyǵyndy syltaýratty
Turǵyndar káriz sýyn aǵyzatyn jerdi aýystyrý jóninde resmı ótinish jasaǵan. Alaıda aýdandyq ákimdik pen qurylys bólimi jobany ózgertý múmkin emes ekenin alǵa tartqan. Sebebi qurylysqa 3,5 mıllıard teńge jumsalǵan. Qosymsha túzetýler jańa shyǵyndardy talap etedi, degen ýáj aıtyldy.
Bıliktiń bul jaýabymen kelispegen aýyl jurty sotqa júginip, aqyry ádildikke qol jetkizdi.
Sot: turǵyndardyń ýáji negizdi
Qaraǵandy oblystyq mamandandyrylǵan aýdanaralyq ákimshilik sotynyń sýdıasy Dáýren Dıýsenbaev jobanyń bastapqy kezeńinde qoǵamdyq tyńdaý ótkizilmegenin, halyqtyń pikiri eskerilmegenin atap ótti.
– Sot Qaraǵaıly turǵyndarynyń ekologııalyq qaýipsizdikke alańdaýy negizsiz emes dep tapty. Jaýapkerler tarapynan talapkerlerdiń sý resýrstaryna keler qaýip týraly dálelderge naqty baǵa berilmegen. Gıdrologııalyq saraptama júrgizý qajettiligi de eskerilmegen, - dedi sýdıa.
Sot sheshimimen Qarqaraly aýdanynyń ákimdigi men qurylys bólimine bir aı ishinde jobany qaıta qarap, káriz sýyn aǵyzatyn balama oryndy anyqtaý tapsyryldy.
Bul jaǵdaı Qaraǵaıly turǵyndarynyń ekologııalyq qaýipsizdik qaǵazdaǵy emes, shynaıy ómirdegi quqyq ekenin dáleldegenin kórsetti. Olar qorshaǵan orta men taza aýyzsýdyń taǵdyryna beıjaı qaramaı, bılikti jaýapkershilikke tartýǵa bolatynyn aıqyn kórsetti.
Osyǵan deıin qoǵamda sýdy utymdy paıdalaný mádenıetin qalyptastyrý maqsatynda Sý resýrstary jáne ırrıgatsııa mınıstrligi turmystyq jaǵdaıda sýdy únemdeýge arnalǵan ádistemelik usynystar ázirlengeni jaıly aıtylǵan bolatyn.