Qaraǵandy oblysynyń joldarynda 1600-den astam kólik keptelip qalǵan

QARAǴANDY. KAZINFORM - Aýa raıynyń turaqsyzdyǵyna jáne qysqy qaýip faktorlarynyń saqtalýyna baılanysty óńirdiń negizgi baǵyttaryndaǵy qozǵalys polıtsııa qyzmetkerleriniń súıemeldeýimen júzege asyryldy. Joldarda keptelip qalǵan 1600-den astam kólik kollonasy eldi mekenderge jetkizildi.

Qaraǵandy oblysynda avtokólikterdi ońtústik baǵytta súıemeldeý uıymdastyryldy. Bul sheshim qolaısyz aýa raıy jaǵdaılaryna baılanysty qabyldanǵan. Qaraǵandy — Balqash avtojolynyń ýchaskesinde patrýldik polıtsııa shamamen 700 jeńil jáne 400-ge jýyq júk kóligin qamtyǵan kolonnanyń qaýipsiz qozǵalysyn qamtamasyz etti.

Sonymen qatar qarsy qozǵalysta, oblys ortalyǵy baǵytynda 300-den astam jeńil jáne 250 júk kóliginen turatyn kolonna júrip keledi. Jalpy kúnniń jylynýyna qaramastan, ashyq dala aýmaqtarynda jáne eldi mekender arasyndaǵy keńistikterde qysqy qubylystar — kóktaıǵaq pen qatty búıirlik jel saqtalýda. Bul jol jaǵdaıyn edáýir qıyndatyp, jol-kólik oqıǵalarynyń qaýpin arttyrady.

Qaraǵandy oblysy polıtsııa departamenti patrýldik polıtsııa batalonynyń komandıri Medet Nurmuhanov óńir turǵyndary men qonaqtaryna asa qajettilik bolmasa, eldi mekenderden tys jerlerge shyǵýdan ýaqytsha bas tartýǵa keńes berdi. Onyń aıtýynsha, súıemeldeý rejımi óńirdiń negizgi avtojoldaryndaǵy meteorologııalyq jaǵdaı tolyq turaqtanǵanǵa deıin saqtalady.

Eske sala keteıik, Aýa raıynyń kúrt nasharlaýyna baılanysty óńirdegi jol-kólik ahýaly erekshe baqylaýǵa alynyp, joldarǵa 150 qyzmetker shyqty.