Qaraǵandy oblysynda ózenderdegi muzdyń erýi tasqyn qaýpin týdyra ma
QARAǴANDY. KAZINFORM — Óńirdegi sý aıdyndarynyń basym bóliginde muzdyń qozǵalysy men sý deńgeıiniń kóterilýi baıqalyp otyr. Soǵan qaramastan, tasqyn jaǵdaıy qutqarý qyzmetteriniń tolyq baqylaýynda.
Qaraǵandy oblysynda ózenderdegi maýsymdyq sý kóterilý kezeńi jalǵasyp jatyr. Bul úderis muzdyń qarqyndy erýimen qatar órbip otyr. Qazgıdromettiń kúndelikti gıdrologııalyq bıýlletenine sáıkes, birqatar ýchaskede kóktem mezgiline tán tabıǵı qubylystar tirkelip otyr: sý muz qabatynyń ústine shyǵyp, jekelegen tustarda onyń buzylýy men jyljýy baıqalady.
Nura, Sherýbaınura, Soqyr, Topar jáne ózge de ózenderde muz ústimen sý aǵýy, ishinara muz qatý qubylystary men jaǵalaýlyq muz qalyptasqan. Buqar jyraý jáne Nura aýdandaryn qosa alǵanda, keıbir aýmaqtarda táýlik ishinde sý deńgeıi edáýir kóterilgenimen, ol belgilengen qaýipsiz shekterden aspaıdy. Jekelegen ýchaskelerde muzdyń qaraıyp, qurylymynyń álsiregeni baıqalady — bul ózenderdiń jaqyn kúnderi muzdan bosaıtynyn bildiredi.
Іri sý qoımalaryndaǵy jaǵdaı turaqty kúıinde qalyp otyr. Atap aıtqanda, Samarqand jáne Sherýbaı-Nura sý qoımalary shtattyq rejımde jumys istep jatyr. Sý jınalý kórsetkishi turaqty baqylaýda jáne qaýipsiz deńgeıden aspaıdy.
Qaraǵandy oblysynyń Tótenshe jaǵdaılar departamentinde óńirdegi gıdrologııalyq ahýaldyń búgingi tańda turaqty ekeni atap ótildi. Gıdrobeketterde tirkelgen sý deńgeıi qaýipti mejelerge jetken joq, turǵyn úılerdi sý basý jáne avtojoldarda tasqyn sýlardyń jaıylý faktileri anyqtalmaǵan.
Naýryz aıynyń ortasynan beri óńirde aýqymdy aldyn alý sharalary júıeli túrde júrgizilip keledi. Qutqarýshylar áskerı bólimdermen jáne jergilikti atqarýshy organdarmen birlesip, qorǵanys bógetterin nyǵaıtý, ınertti materıaldar toltyrylǵan qaptardy tóseý, sondaı-aq sý ótkizý júıelerin tazartý jumystaryn istep jatyr. Búginde myńdaǵan qap ázirlenip, aryq jelileri tazartylyp, júzdegen sý ótkizý qubyrlary arshyldy.
Sonymen qatar ózenderde muz keptelisiniń aldyn alý maqsatynda 12 ýchaskede jarý jumystary júrgizildi. Bul sharalar Buqar jyraý, Abaı, Osakarov, Nura, Aqtoǵaı jáne Qarqaraly aýdandarynda júzege asyryldy.
Tótenshe jaǵdaılar departamenti ahýal táýlik boıy úzdiksiz baqylaýda ekenin málimdeıdi.
Tasqyn qaýpi bar aımaqtarda turaqty kezekshilik uıymdastyrylyp, kez kelgen ózgeristerge jedel áreket etý arqyly halyq úshin yqtımal qaýip-qaterlerdi barynsha azaıtýǵa múmkindik jasalǵan.
Buǵan deıin elde sý tasqyny qaýpi bar jol ýchaskeleri azaıǵany týraly habarlanǵan bolatyn.