Qaraǵandy oblysynda orta ǵasyrǵa tán balanyń zıraty tabyldy
QARAǴANDY. KAZINFORM – Qaraǵandy oblysyndaǵy Nura aýdanynda arheologtar orta ǵasyr dáýirine jatatyn, búginge deıin buzylmaı saqtalǵan bala zıratyn anyqtady. Biregeı olja E.A. Bóketov atyndaǵy Qaraǵandy zertteý ýnıversıtetiniń ekspedıtsııasy júrgizgen dalalyq zertteý kezinde tabylǵan.
Arheologtar burynnan belgili «Izendi-6» qorymynyń aýmaǵyn zertteý barysynda kózge ilinbeı kelgen qabirdiń ornyn anyqtaǵan. Qazba jumystary kezinde ashylǵan jerleý orny ejelden beri buzylmaı, bastapqy qalpynda saqtalǵan.
Qabirden 9–12 jas shamasyndaǵy balanyń qańqasy, jebe ushtary, jylqynyń er-turman jabdyqtary men bylǵary qalta tabyldy. Sondaı-aq marqummen birge kómilgen erekshe syrǵa – suraq belgisi tárizdes metall áshekeı – zertteýshilerdiń nazaryn aýdardy. Mundaı syrǵalar XII–XIV ǵasyrlardaǵy qypshaq taıpalaryna tán áshekeı buıymdardyń qatarynan sanalady.
Antropologııalyq saraptama nátıjesin antropolog Aıkúmis Raısova jarııa etti. Osteologııalyq taldaý barysynda bala tiri kezinde sol jaq ıyǵyn syndyryp alǵan, alaıda súıek bala kóz jumbas buryn bitip úlgergeni anyqtalǵan.
— Mundaı jerleý óte sırek kezdesedi. Qaraǵandy óńirindegi orta ǵasyrlyq eskertkishter áli tolyq zerttelmegen. Sondyqtan bul oljalar tarıhı turǵyda da, ǵylymı turǵyda da asa qundy, — deıdi Saryarqa arheologııalyq mýzeıiniń dırektory Alekseı Kýkýshkın.
Zerthanalyq radıokómirtekti taldaý nátıjesine súıensek, balany XII–XIII ǵasyrlar aralyǵynda jerlegen. Arheologtar aldaǵy ýaqytta qosymsha qazba jumystary men zertteý júrgizýdi josparlap otyr.
— Tabylǵan buıymdardy spektraldy taldaý arqyly zerttep, olardyń metall quramyn anyqtaımyz. Keıin barlyq artefakti oblystyq tarıhı-ólketaný mýzeıine tapsyrylady, — dep naqtylady Kýkýshkın.
Osyǵan deıin Ál-Farabı atyndaǵy QazUÝ-dyń arheologııalyq ekspedıtsııasy saq dáýirine jatatyn altyn áshekeılerdi tapqany jaıly jazǵan bolatynbyz.