Qaraǵandy oblysynda qola dáýirine jatatyn turǵyn úı qaldyqtary tabyldy
QARAǴANDY. KAZINFORM – Buqar jyraý aýdanynda E. A. Bóketov atyndaǵy Qaraǵandy ýnıversıtetiniń arheologteri qola dáýirine jatatyn kóne turǵyn úıdi anyqtady. Erekshe tarıhı olja Tórtkól aýyly mańynda ornalasqan.
Arheologııalyq nysan – tastan qalanǵan qos qabyrǵaly, jartylaı jertóle úlgisindegi qurylys.
Qazba jumystary barysynda ǵalymdar geometrııalyq órnekpen áshekeılengen qysh ydys synyqtaryn, janýarlardyń súıekteri men tastan jasalǵan eńbek quraldaryn, shaqpaq tastan jasalǵan jebe ushyn jáne metall pyshaq tapqan.
Mamandar arheologııalyq bul nysandy Alakól mádenıetine jatqyzyp otyr. Aldyn ala boljam boıynsha, turǵyn úı bizdiń dáýirimizge deıingi XVII–XVIIІ ǵasyrlarda turǵyzylǵan.
– Alda qysh buıymdaryna tehnıkalyq jáne tehnologııalyq saraptama júrgizilip, radıokómirtektik taldaý úshin úlgiler jiberiledi. Bul zertteý nysannyń naqty ýaqyt mejesin anyqtaýǵa múmkindik beredi. Qola dáýiriniń eldi mekenderin zertteý arqyly ejelgi Ortalyq Qazaqstan turǵyndarynyń ómir salty men sharýashylyq júıesi jaıly bilimimiz keńeıe túsedi, - deıdi Saryarqa arheologııalyq ınstıtýtynyń dırektory Alekseı Kýkýshkın.
Aıta keteıik, buǵan deıin dál osy ýnıversıtettiń ekspedıtsııasy Nura aýdanynda shamamen myń jyl buryn jerlengen balanyń qorymyn tapqan bolatyn.