Qaraǵandy oblysynda er adam eki dárigerdi soqqyǵa jyqty

QARAǴANDY.KAZINFORM – 2 maýsym kúni Qaraǵandy oblystyq balalar aýrýhanasynda 38 jastaǵy oblys turǵyny dárigerlermen sózge kelispeı qalyp, soqqyǵa jyqqan. Bul týraly Polisia.kz jazdy.

— Kúdikti oqıǵa ornynda ustalyp, ýaqytsha ustaý ızolıatoryna qamaldy. Atalǵan fakt boıynsha sotqa deıingi tergeý júrgizilip jatyr. Oqıǵanyń barlyq mán-jaıyn jan-jaqty jáne obektıvti anyqtaýǵa baǵyttalǵan qajetti tergeý áreketteri júzege asyrylmaq, — delingen aqparatta.

«Zań men tártip» qaǵıdatyn júzege asyrý aıasynda zańsyz áreketter úshin jazanyń bultartpastyǵy qatań túrde qamtamasyz etiledi. Ásirese medıtsına qyzmetkerlerine qatysty kúsh qoldaný áreketi — qoǵamdyq tártiptiń óreskel buzylýy retinde baǵalanyp, jol berilmeıtin jaǵdaı bolyp tabylady.

Eske sala keteıik, buǵan deıin Temirtaýda jedel járdem feldsheri soqqyǵa jyǵylǵanyn jazǵan edik.

Qoǵamda osyndaı keleńsizdikterdiń aldyn alý úshin  Astana men Almatyda jedel járdem qyzmetkerleri vıdeojeton paıdalana bastady.